太古地產連續第三年為太古城中心搞暑期活動，刺激消費，管理高級經理郝唐惠莉話，今年「欲罷不能」，因為上半年商戶營業額，較去年同期有兩位數字增長，單是七一回歸假期，嚟嘅人次超過二十二萬，創下該場近二十年新高。
應租戶要求，今次加料炮製歷險競賽，包括透視攀石牆和真人空中保齡球等，消費滿三百蚊就可以玩。郝太一向口密，話最近新租戶有年輕化趨勢，租金有所調升，但實際數字欠奉，只補充話，太古有攤分租戶嘅經營利潤，因此租戶好、太古好。
蘭西諗，若果人流再創新高，太古會否再加租，抑或只分多少少商戶利潤，就係未知之數。
利嘉閣前老細羅林渭再傳重出江湖，聽聞落腳點係西貢銀線灣廣場新代理行第一亞洲，人手包括利嘉閣西貢分行阿頭黃富傑。
蘭西問過，羅林渭話，冇打算重投代理行業，只係以顧問形式，為第一亞洲黎老闆提供意見。
黃富傑越洋回應，否認過檔，不過，短期內會唔會離開利嘉閣就好難講。
其實羅林渭早於年頭樓市飆升時，已有重投代理行業念頭，佢周圍嘍人合作，不過傾足半年，傾到個市由旺變靜都傾唔掂，主要係羅林渭一廂情願大搞，以西貢區為大本營，再進攻九龍塘、南區、半山等豪宅區，甚至計劃上市，不過，對手多數俾佢嘅大計嚇親，打其退堂鼓。
世邦魏理仕一年一度比較全球寫字樓租金，報告剛剛出爐。一百五十八個城市當中，香港排第二十四，比舊年第三十一位升番啲。每年每方呎租用成本四十八美元，即每月每呎三十一個二，較舊年貴百分之十四點二巴仙，係升幅最高三個城市之一。
每呎租用成本最貴仍然係倫敦，比香港貴兩倍七。
新世界中國獲內地《經濟觀察報》及《北京青年報》評選為「2004年度中國藍籌地產企業」，全國只得十八家發展商攞到呢個評級。
新中投資者關係經理趙志方話，今次評選係第一次純用企業規模、財務資料、土地儲備及專案分布等嚟做準則。
該公司內地土儲逾億七呎，夠八年用。
蘭西
電郵地址：