被封韓國四天王嘅元斌、張東健、裴勇俊同李秉憲，近排令日本颳起一股韓風，搞到班師奶暈陀陀。最近日本雜誌《女性Seven》就幫佢哋嚟個胸肌大比拼，估唔到四天王當中最矮嘅李秉憲，原來身材最健碩，羅拉都覺得幾意外。
身高五呎十吋半嘅李秉憲，因為閒時鍾意健吓身，所以胸肌有成四十二吋，成為四天王之冠，相信唔少師奶都好想挨落憲哥個心口度，感受吓佢有幾科。而成日喺電影度飾演硬漢嘅張東健，亦有四十一吋，排名第二；不過外號「奶師殺手」、身高五呎十一吋嘅裴勇俊就差少少啦，因為佢個胸只有四十吋，同五呎十吋半嘅元斌一樣包尾。四個型男嘅胸肌夾埋有成一百六十三吋，假若有朝佢哋齊齊赤膊，肯定冧死唔少師奶。
近期韓風喺日本咁盛，搞到日韓婚姻介紹所應接不暇，因為好多日本女仔都想嫁個好似四天王咁嘅帥哥，現時日方嘅會員人數已經有千二人，比韓國嘅男會員多二百人。
另外，早前日本一間叫文藝春秋嘅出版社，推出一本韓國四天王嘅寫真集，幾經糾纏後，間出版社前日終於肯開記者會道歉，希望平息糾紛。
而遲遲都未入伍服兵役嘅元斌，前日出席記招時又話會拍多一部片先當兵，對於廣大嘅fans嚟講，都係一個喜訊！