容祖兒（Joey）昨日在灣仔書展中，為其全新寫真集舉行簽名會。Joey在寫真集中穿上性感透視裝示人，但因露出半個屁股遭英皇下令用電腦將打底褲加長才可出街。不過Joey昨日表示不怕性感惹來狂蜂，最驚的反而是「深圳容祖宜」。
容祖兒昨日在灣仔會展舉行的書展中，為其處女寫真集《TheRealJoey》舉行簽名會，由於大會限制索取簽名人數不得多於二百人，所以不少到場的fans都未能取得Joey的簽名，由於簽名活動安排在走廊位置舉行，現場又有工作人員維持秩序，故全程未有出現混亂場面。而昨日到場的fans大部份以少女居多，其中有一名年約六十歲的阿婆更高舉Joey的橫額在現場排隊。
問Joey拍下性感照後，可會怕惹來狂蜂浪蝶？Joey卻表示比較怕「深圳容祖宜」多一些，她說：「我好驚近日嗰本周刊呀，真係引起不安，我噚日拍戲，啲男士斜眼望住我，好心寒，啲工作人員都以為係我，我都覺得似，簡直係模仿大賽，好驚呀，啲朋友話佢可以做我替身，正面都咁似。有人似我可以接到三個廣告，我都好開心，係咪我唔啱價，所以益咗佢呢？」
而Joey的經理人霍汶希透露，由於昨日有約二百名fans未能順利拿得簽名，不少人更淚灑當場，所以公司決定下月一日在西九龍中心再辦一次簽名會，到時會有一千個名額。霍汶希又指昨日已賣出超過一千本寫真集，出版商即日便要補貨。
談到Joey在寫真集中有一張穿上湖水綠透視裝的相片，霍汶希表示相片是經過電腦加工，她說：「因為張相太性感，露咗半個patpat出嚟，所以我哋要求用電腦加長入面條打底褲，好多傳媒想登原相都俾我哋拒絕咗，我都有問Joey點解條褲咁短都肯影，佢話：『我只係覺得patpat涼陣陣咋喎！』」
對此Joey則說：「因為攝影師係女仔，影嘅時候會free啲自然啲，件衫又幾好擺甫士，可以騷到我嘅S形同八字，影嘅時候都唔覺咁短，最緊要靚啫，你哋話靚咪得囉！不過我都驚影響視覺效果，可以擺得幾圍（指臀部）㗎。」
Joey又透露在英國劍橋大學拍攝寫真照片時，被飲醉酒的學生索吻，她說：「我最難忘喺劍橋影相時，有學生飲醉酒，原來劍橋學生都會撩女仔㗎喎，飲醉咗重喺後面跑前想咀我，我好驚呀，唉，真係世風日下。」
此外，倫永亮和葉璇昨日分別在書展舉行簽名會，倫永亮透露前日得知林憶蓮已返回香港，他說：「我好大頭蝦，成日唔見咗朋友嘅電話，平時都係同佢經理人聯絡，呢兩日我會打電話聯絡佢。我𠵱家籌備緊音樂劇，事成都希望可以邀請憶蓮參與，佢離婚我都覺得好可惜，不過人係不斷改變嘅，變可以係更好，佢哋都係為咗雙方好先決定分開啫。佢兩公婆向來低調，憶蓮從來冇同我講私人嘢，佢哋分開我都係最後一個先知。」
而葉璇昨日則一臉疲態，她透露早前在雅典被偷去身份證和車牌，近日忙於補領，日內會再到雅典做奧運主持，她表示此行已買了旅遊保險。
採訪：魯萍 攝影：何國豪
