奧運足球一向畀人戲碼好弱嘅感覺，但今屆雅典奧運嘅情況有變，唔單止唔弱，重不知幾咁有睇頭㖭。
奧運雖然係畀二十三歲以下球員玩，但係參賽十六支球隊喺遞交嘅十八人名單時，可以包括三個超年齡球員；而如果大國腳未超齡嘅話，隊內隨時有超過三個頂級球員，實力同經驗分分鐘同A隊有得揮。
好似葡萄牙咁，佢哋陣中就有基斯坦奴、泰亞高、普斯迪加同摩利拿；而阿根廷重勁，有泰維斯、軒斯、艾耶拉同沙維奧拿助陣；至於啱啱攞歐洲二十一歲以下錦標嘅意大利更厲害，選咗派路、比列斯素利、費拉利同基拿甸奴。
奧運足球咁星光熠熠，最開心嘅當然係球迷，但班球星就慘啲，好似艾耶拉同沙維奧拿咁，喺秘魯踢完美洲國家盃後，轉個頭又要飛去希臘踢奧運，想放番個長啲嘅暑假，惟有等下年啦！
前德國國腳奇連士文日前發聲明，證實將跟德國足總商討做教練，協助國家隊應付○六年世界盃。一般相信呢個「協助」，就係比亞荷夫做埋國家隊領隊。希望呢次事成，嚟緊就有機會睇到佢哋同盛傳係荷蘭新帥嘅尹巴士頓，三位一代射手再次喺球場上較技，鬥扭六壬嘅場面嘞。
喀麥隆前鋒伊圖又傳過檔巴塞，不過皇馬有佢一半擁有權，最後皇馬梗唔放人啦。但伊圖下季又未返得皇馬喎，因為正選陣已有朗拿度、卡洛斯及森美爾三位非歐盟球員，皇馬打算再留佢喺馬略卡踢多季，到○五年球季至收番；所以呢件非洲快馬，成日話轉會其實都係得個講字！
列斯今季降咗班、主將幾乎賣得就賣（重係賤賣嗰隻），但由零開始唔代表霉氣已消。話說班波上星期六去挪威踢友賽時，中場巴基就整傷十字韌帶，未開「咧」就已提早收「咧」。巴基係列斯陣中名氣最大同最有份量嘅主將之一，無埋佢……，真係唔知列斯衰氣幾時散嘞。
剛來港為傑志踢咗場好波嘅白頭佬拉雲拿利，日前被佩魯賈棄用，理由係佢唔接受會方只願同佢簽一年約，望簽夠兩年。佩魯賈會長加奧治甚至高調講永不錄用！到底雙方係咪只就合約年期鬧分歧而反面，非我所能求驗，不過就為白頭佬無得留喺母會收山同埋將來做總監感可惜。