黎明同舒淇嘅關係真係欲斷難斷，之前有報道話黎明同舒淇已經分手，所以舒淇已經搬屋離開傷心地，不過前晚有人就親眼見到黎明同舒淇喺跑馬地撐枱腳飲紅酒，黎明重飲到成塊面紅卜卜，睇嚟佢同舒淇食飯都好盡興啫。
前晚九點鐘，黎明坐住佢部黑色保母車去到跑馬地成和道嘅Teca餐廳，當時黎明着住件運動衫，頭戴鴨舌帽，佢一到埗後就一支箭咁衝咗入餐廳，冇耐舒淇又九秒九咁衝埋入去，不過企喺餐廳門口嘅泊車人員知道有明星幫襯，馬上四圍視察環境，之後有人見到有記者在場，重同黎明通風報信㖭。
直至十一點，黎明至同司機一齊行出餐廳，黎明因為飲咗酒，成塊面紅到不得了，佢一見記者影相即刻黑面，上到車就耷低頭以帽遮面，而間餐廳就喺十二點打烊，相信舒淇喺黎明走之前，已經趁亂閃咗咯。
此外，前幾日馮仁昭咁啱同新任東亞唱片（集團）有限公司嘅行政總裁何哲圖（Herman）食飯，席間Herman話公司喺下周三會假洲際酒店舉行黎明MV首播儀式，兼公布埋集團旗下嘅東亞唱片製作有限公司、黎明所屬嘅AMusic公司正式成立。
馮仁昭提議不如搵舒淇做嘉賓，點知話口未完，黎明就約舒淇撐枱腳，唔知佢係咪趁食飯順勢請舒淇做記者會嘉賓呢？
台灣華視總經理江霞曾批評蕭薔過氣，噚日蕭薔上咗華視節目《快樂星期天》表演跳舞，佢兩個重扮晒friend，攬頭攬頸同拖手畀記者影相，江霞話歡迎佢去華視拍戲同唱主題曲，而蕭薔就話自己會全力以赴。所以話娛樂圈冇永遠嘅敵人，呢個又係一例證。
張栢芝早輪腎炎，秘密入院治理。佢兩個細佬張栢文同張豪龍前晚出席運動用品活動嗰陣時，就代家姐報平安。張豪龍話：「佢返咗北京拍戲，身體冇事，屋企人都有煲湯畀佢飲，我都有陪佢。其實之前個病唔係好大件事，係之後佢突然發燒，所以要入醫院吊鹽水囉！」
許志安噚日喺港大何鴻燊足球場拍攝無綫奧運片段，佢重上陣踢波。安仔近排成日幫無綫做節目，似乎有取代李克勤之嫌，而安仔日前又話食緊無綫嘅飯，好鬼擦無綫鞋，佢噚日話：「如果我年尾攞到最佳男歌手獎，我重會將個台徽紋喺個心口，言出必行，我幾時攞就幾時紋。」馮仁昭都覺得安仔恨攞獎恨到出面喎！
噚日有報道話林建明抑鬱症復發，身為佢好朋友嘅查小欣噚日就喺節目度講番大姐明嘅情況，佢話一早已經收到大姐明嘅電郵，話自己嘅情況麻麻哋，報道指佢私底下減咗服食抑鬱症嘅藥，但其實係大姐明聽醫生吩咐下減藥，點知減咗藥一個星期就復發。不過大姐明噚日已經覆診，大家可以放心。
