新約簽冇耐再續到09
求驗客手記：保方膺祖記非賣品

不嬲精打細算嘅祖雲達斯，今年四月同鋼門保方續約至○八年重唔夠，日前再同佢續多一年至○九年。印象中祖記甚少響咁短時間內與同一個球員續完再續，反映會方幾睇重保方台戲。此舉某程度亦算祖記公告天下，邊隊波想挖保方，難矣！
眾所周知，祖雲達斯傳統以嚟都好識計數，計唔掂數嘅話，話之你係巴治奧或者施丹呢類天王巨星一樣照賣；覺得你掂就多多唔怕畀。保方係當今首屈一指鋼門，又係歐洲國家盃意軍其中少有表現冇走樣嘅球員，以龍門嚟講二十六歲又真係有排玩，祖記長線投資無可厚非。原來據保方自己講，意大利奧運隊方面本來都想佢參加今年奧運，不過保方話要同祖記踢歐冠盃外圍賽，撞晒期所以冇計。又係嘅，會方咁對你，唔以球會為先就勢係假。

沙維奧拿入籍西國博唔使做巴塞人球
巴塞隆拿嘅阿根廷前鋒沙維奧拿由於外祖母係西班牙人，所以佢喺日前獲得西班牙公民身份。沙維奧拿變本地球員，幫巴塞慳咗個非歐盟球員名額，對佢抑或球會都有着數；而聽講巴塞諗住將佢借畀馬體會，𠵱家沙維奧拿變咗「西班牙人」，唔知巴塞會唔會收回成命呢？

皇馬出王牌經理人隔住阿仙奴斟韋拉
皇家馬德里為咗可以喺阿仙奴手中搶走法國中場韋拉，使出撒手鐧，派撬走費高嘅「中間人」維辛迪親自去同韋拉斟。國際足協規定，阿仙奴一日唔sayyes，皇馬都唔可同韋拉傾，但維辛迪唔係皇馬嘅人，故可直接同韋拉對話。皇馬為咗買得心頭好，真係無所不用其極。

黑雙煞各有出路樸記搵約基啱踢
布力般想賣走「黑雙煞」前鋒，成功將高爾轉手富咸後，亦恨到有約基「買家」樸茨茅夫出現。約基一直喺布力般失寵，呢次走唔甩都可以叠埋心水收山嘞。而「老樸」今季亦有舒寧咸離隊，搵同樣經驗豐富嘅約基，帶住條前鋒線嚟踢就啱晒；我求大俠就祝佢哋皆大歡喜啦。

費古羅亞打機出色走位叻原來有秘技
阿根廷響今屆美洲國家盃表現理想，原來除職球員外重有一個「功臣」—PS2遊戲機。前鋒費古羅亞係百分之一百PS2足球遊戲迷，成日捉住隊友同佢對賽，而佢又經常憑出眾「球技」贏波。費古羅亞甚至話佢喺比賽中嘅走位靈感，唔多唔少都係由遊戲中培養出嚟，咁都得？