日本組合SMAP五位成員拍廣告嘅酬勞雖然一啲都唔平，但係一樣勁受日本廣告商歡迎，皆因佢哋經常都有出位搞鬼之作。好似最近草囗剛同木村拓哉所拍嘅新廣告，就睇到我大口羅拉笑到合唔埋口。
草囗剛早前為一日本汽車公司拍咗個廣告，宣傳出租汽車服務。喺個廣告入面，草囗扮演一位唔多可靠嘅太空船船長，因為唔小心迷路，與同船嘅女船員同埋一隻外星青蛙一齊嚟到地球，最後佢哋連自己架太空船都唔要，索性租架車喺地球四圍去。成個廣告嘅造型抄足七十年代嘅《星空奇遇記》，尤其係草囗剛嗰個騎呢髮型同埋一對尖耳，真係十足個冼樸隊長款，夠晒頂癮。
至於木村拓哉，佢最近就為佢一向做開代言嘅日本健康食品公司拍咗新一輯廣告。喺廣告入面，佢一人分飾兩角，正當着住套夏老威嘅木村同兩位性感金髮美女喺遊艇上逍遙快活嘅時候，另一位以西裝友打扮嘅木村突然出現，重滿腔怒氣㖭。但到最後，呢位憤怒嘅木村歎完呢款健康食品後，即刻成個人鬆晒。