恒指大升271點，地產股最風騷。地產股4大天王，長實（001）升3.9%，新地（016）升3.1%，恒地（012）升2.7%，新世界（017）升4.1%。地產分類指數已經上到本月初、上月中頂部，亦略高過5月底頂部。個勢靚，有機破頂而上，地產股再下一城，吼地產Call輪炒兩炒。地產Call輪昨日升幅唔細，要入市，須有膽量，亦只宜細細注。保守做法則係吼低位上車。
長實Call輪對象有兩件，9227同9973。9227喺11月上旬夠鐘，輪價45仙，溢價5.0%，槓桿率13.2倍。9973喺11月初到期，輪價31仙，溢價7.3%，槓桿率19.2倍。9227數據靚，溢價唔高。9773則啱搏殺炒家埋位，槓桿率爆炸力夠，自然要畀多少少溢價。
新地Call輪揀9391，12月中夠鐘，輪價57仙，溢價5.8%，槓桿率11.5倍，數據靚，買賣易，其他新地Call輪，比唔上9391。
恒地Call輪冇乜可供選擇，數據靚嘅係9037，弊在交投極疏。新世界Call輪亦冇隻揀得落手。
太A（019）收52.75元，升2.4%，同大市（恒指）同步。大市好，呢隻大藍籌唔會唔好。吼住買太ACall輪，標準輪冇邊隻啱睇，可以諗吓鎖定回報Call輪9176，收16.2仙，升4.5%。明年3月到期，唔使睇啲表面數據睇得太緊，搭順風車。正股去，隻輪亦去。
章盛