大型商場落成，大業主都會搵啲主要租客，承租大量樓面，等其餘舖位能夠較容易以好價錢租出。恒基大角嘴港灣豪庭廣場，二十四萬呎商場，獲超級大租客承租，佔用十一萬方呎，差不多等於租咗半個商場，都算罕見。
呢個超級大租客係「批發城」，打探之下，先知原來係做包租公，會將十一萬呎分為逾八十個舖位，五百至萬五呎，分租畀建築材料、家居用品、家具及家居擺設等公司，等想裝修家居人士，一次過可以買齊所需物品。呢個「批發城」九月中開業。
至於向「批發城」租舖，會以提成來計算租金，另租客每月要畀每呎四個半行政費，以及兩蚊廣告費。
嘉華西灣河鯉景灣商場蘇豪東，經營成功，佢哋新出「嘉華通訊」，都用個場做封面專題，但唔係純宣傳。
文章詢問九三年拍板買入呢個場嘅集團主席呂志和，道出買入原因，佢話臨海私人屋苑少，鯉景灣又有海濱長廊，極具發展潛力，價錢只係一億九七，好合理。今日呢個場值七至九億。
負責呢個場嘅嘉華助理總經理陳玉成話，蘇豪東有二十八間食肆，好多一家大細去幫襯，夠晒「家庭感覺」。
富豪酒店旗下沙田麗豪酒店，較早時發生集體食物中毒事件，因為呢單嘢始終會對食客有心理影響，為咗挽回食客信心，主席羅旭瑞，前晚與旭日國際主席蔡志明，親身去食晚飯，證明對重開嘅餐廳衞生充滿信心。
為咗進一步洗刷食肆負面形象，同系百利保，聽日舉行元朗彩虹軒記招，地點特登揀呢度，其間重安排午宴，招待傳媒㖭，相信各大傳媒老記都唔會擔心啩。
過去富豪同百利保搞記招，地點多數喺銅鑼灣富豪香港酒店。
水療及香薰Spa，係近年新樓盤會所新興設施，西灣河嘉亨灣會所Club@SEA都唔少得，重搵埋唐安麒美顏瘦身專門店主理，提供全套服務。噚日開記招，介紹會所，擺咗個按摩池，等大家感受吓有幾歎，重有模特兒，着住三點式泳裝，即席浸落個按摩池，畀各位謀殺菲林，成為全場焦點。
除咗Spa，會所有七十幾項設施，請嚟唔少名人開班授徒，好似李暉主理太極班、李啟淦嘅公司開游泳班等等。
地產代理近年都搞員工培訓，請專業人士，講授相關知識，世紀21最近就請咗百利好集團董事郭昶（圖四），做主講嘉賓，講吓「銷售技巧及營業員必勝技」。
郭昶除咗分享自己銷售經驗，又講管理層成功之道，就係要同下屬有福同享，有禍同當。
因為係真實經驗，重用市井俚語嚟表達，所以絕無冷場。反應咁好，世紀21可能會搵佢加場添食都未定。
田家炳基金持有嘅屯門田氏廣場，剛錄得大手租務成交，中原黃啟成話，十四及十八樓，分別獲兩家電子公司承租，合共十萬六呎，做貨倉，全包呎租兩個四，租期兩年。
兩個租客原租用葵荃面積相若嘅貨倉，今次因租金低兩三成，才轉租田氏廣場。大廈租出五層，佔兩成半樓面。
田氏廣場前身為力善多元化工業城，○二年翻新，改名後推出招租，所得租金，會捐作慈善用途。
蘭西
電郵地址：
