名模林志玲近來喺台灣嘅風頭好勁，佢喺當地網上一個「比基尼帥哥美女大調查」中贏咗冠軍，啲網友話林志玲上圍34C，大細適中，可以話係天使面孔，魔鬼身材。而男藝人方面嘅選舉就由金城武排第一，古天樂第二，萬人迷碧咸都只係排第三。
而啱啱同香港名模周汶錡分手嘅杜德偉，噚日喺台灣舉行唱片宣傳，佢話𠵱家感情生活真空，重話自己鍾意林志玲，覺得佢樣靚身材正外，連把聲都正過人，如果林志玲想包佢嘅話，佢一定應承。
台灣傳媒問佢有乜優點值得林志玲包，佢話：「我服務好、功夫好，長得又帥，而且我才二十五歲（其實四十二歲）。」之後又話：「朋友會偷按我屁股，按過都說它硬又結實，像是『黑人的屁股』，它應該真的有過人之處吧！」
周汶錡早排同國民黨主席連戰個仔連勝文傳緋聞，杜德偉冇咗香港名模女友，突然話想俾台灣名模包，佢咁講似乎真係受咗刺激，不過杜德偉話周汶錡送咗佢出嘅新書畀自己，所以亦諗住送番張唱片畀對方，禮尚往來咁話喎。
張栢芝因為喺蒙古拍《無極》而患上腎炎，經理人公司即刻安排佢返港治療。有內地消息話栢芝喺香港留院期間，前男友謝霆鋒成日去醫院探佢，噚日霆鋒亦再陪栢芝飛去幫《無》片開工。報道又話喺內地拍戲時霆鋒好睇栢芝，所以佢今次病咗，霆鋒亦仆倒返去，不過雙方嘅經理人都照例否認。
梁詠琪（GiGi）噚日到電台接受訪問，佢話將於月底推出新碟，封面度重會展示佢修長嘅美腿，GiGi話：「今次終於衝破咗自己嘅障礙，因為我一直好怕露好多肉，但係今次我就豁出去着條熱褲加三吋高踭鞋。」GiGi又話條熱褲好短，所以成日擔心走光，佢話：「我坐喺草地影相時都俾啲草拮住個patpat，所以成日都要好小心咁坐。」
王祖賢早排暴肥嘅相片曝光之後，有成五間瘦身公司搵上門請佢拍瘦身廣告，但係全部俾王祖賢拒絕咗，近日又有Spa嘅老闆娘攞住現金去搵佢，至於王祖賢肯唔肯接，就仍然係未知之數，其實王祖賢喺短短兩個月就已經減咗好多磅，𠵱家已經回復番八成索女嘅狀態。馮仁昭覺得王祖賢一向率性而為，接呢啲廣告，唔啱feel呀！
