小初前日提過，建滔化工（148）喺8月公布的中期業績可能靚爆鏡。點知話口未完，隻股立即爆響口，話盈利會勁升。建滔噚日最高見過15元，收14.60元，大升6.18%，成交股數急增至434萬股，金額6336萬銀，睇落唔似講笑。
經紀黃話，除咗建滔之外，佢嘅愛股之一創維數碼（751），都在下周二公布全年業績，有分析員同佢計過數，估計公司今年嘅盈利數字，分分鐘比舊年多50%。小初聽完真係嚇一跳，估唔到賣電視機會賣得咁掂。
創維噚日最高見過2.40元，收2.30元，升4.55%，成交股數1208萬股，金額2799萬元。
經紀黃話，創維今次業績靚仔，皆因銷售策略正確，一早發展高檔次電視機業務，令邊際利潤提升，就算近月來祖國搞緊宏觀調控，據講亦冇乜影響內地居民對電視機的需求。
雖然近日創維股價回升，但現價距大行嘅目標價仍有大把水位，𠵱家上車仍然有得諗。
慕容小初