大市噚日真係悶得好交關，小初好多經紀朋友都認為同先科國際（724）事件有關，自從先科出事後，大部份莊家股都停晒手，皆因風頭火勢之際，怕自已亦成為目標。
好彩重有個別工業股公布業績異常靚仔，兼夾有唔錯股息派發，受到追捧而令股價上升，令小初重有多少人生樂趣，好似先排嘅香港飲食（688）、聖安娜（192）、長江製衣（294）同埋YGM貿易（375）咁，表現都叫做對得股民住。
經紀黃話，即將在下周二公布中期業績的新確科技（1063）亦可以睇多一眼，呢隻股在過去大半年表現一直好平淡，喺1元附近上上落落，直至最近有業績公布日期後，股價即刻彈上1.10元水平，噚日就再升多3.4%，收1.21元，成交股數777萬股，金額920萬元。
新確近年致力發展歐洲室內無線電話市場，據講表現愈來愈好，希望今次業績唔會令捧場客失望。
在下個月16日公布中期業績的建滔化工（148），據講業績亦係靚爆鏡，但唔知點解近日經常出現沽壓，窒住隻股走勢。
慕容小初