立法會飲食界選戰噚日上演一齣鬧劇，主角係爭取連任嘅張宇人，同埋富臨飯店老闆、人稱「阿一」嘅楊貫一。
噚日張宇人進行誓師參選儀式，佢口口聲聲話公開表明支持另一參選者黃倩瑛嘅阿一，其實都支持佢，但傳媒同時間又收到一張印有「富臨」嘜頭嘅匿名傳真信，大鬧張宇人「厚顏無恥」，明明同阿一已經決裂，重當眾宣讀阿一之前寫嘅支持信。
八方搵到身在廣州嘅阿一，佢話張宇人同黃倩瑛佢都支持，但否認有傳真鬧張宇人厚顏無恥，可能係有人挑撥，佢只想息事寧人，至於唔再做張宇人嘅提名人同助選團團長，阿一聲稱係因為冇時間，噚日張宇人讀嘅支持信，係佢以現代管理飲食專業協會會長身份寫嘅。
雖然張宇人近日被人問起阿一嘅事就面黑，但噚日多個飲食業團體為佢參選助威，收到業界送嘅超級大菠蘿包、苦瓜、豆同雞等食品，祝佢成功當選，佢心情似乎唔錯。
傳真︰2623-9278
電郵︰