今屆亞洲盃勁吹冷風，截至禮拜一為止，六場波開五場下盤；而卡塔爾重樣衰到輸畀印尼一比二，結果佢哋嗰位成日喊走嘅法國籍教練杜斯亞亦喺禮拜二收到大信封，並且成為今屆賽事首個被炒教練。
杜斯亞畀卡塔爾足總炒魷可謂佢自己攞嚟，事關佢喺舊年七月上任成為卡塔爾教練之後，完全幫唔到隊波，除咗喺海灣盃只得第三外，早前喺世盃外圍賽更輸畀伊朗同約旦。其實，杜斯亞都知道卡塔爾足總對佢好唔滿意，於是學人玩事先張揚，話會喺今屆亞洲盃之後辭職，等自己好落台。
點知，聽講佢咁做激嬲咗卡塔爾足總，兼且卡塔爾重喺首仗輸畀印尼，於是卡塔爾索性做主動，炒杜斯亞魷魚，擺明落佢面。所以話，面係人哋畀，架就係自己丟，杜斯亞如果唔係咁玩嘢，就唔會有今日。
皇家馬德里會喺本月尾到日本踢熱身賽，為免好似舊年喺中國同香港咁俾球迷衝入球場同班球星有近距離接觸，佢哋特登請咗一百五十個保鑣保護班球星。我求大俠覺得皇馬唔使咁大驚小怪，雖則日本球迷對足球非常之狂熱，但算係好守規矩，應該唔會有嚇親皇馬班球星嘅事件發生。
艾歷臣自成為英格蘭領隊之後，唔止佢喺球場上嘅表現，連感情生活亦受人關注。英國傳媒話艾歷臣風流成性，成日周圍拈花惹草，所以批死佢遲早同佢個律師女友蘭茜分手。聽講艾歷臣因搭上英足總高層嘅秘書花迪亞，因而結束同蘭茜嘅五年感情，英國傳媒終於恨到啦！
意國球壇近年財政狀況麻麻，球季開鑼前例有球會交唔出保證財政狀況文件，今年里賈納同埋錫耶納交唔出，意足球官員話如果佢哋喺星期四前再交唔出，就會被貶降丙組。至於一直有財政危機嘅拉素就好好彩，獲羅馬商人注資二千一百萬歐元（約二億一千萬港元），逃過大難。
阿仙奴中場韋拉會唔會過檔皇馬，重係未知之數，但由佢引發出嚟嘅轉會傳聞，就多到不得了。「兵工廠」領隊雲格日前話喺開季前會多簽一、兩名球員，英國報章即傳出阿仙奴會以三千萬鎊（約四億四千萬港元）買利物浦嘅謝拉特代韋拉，重話會畀謝拉特九萬鎊周薪！