港股連升3日後，噚日終於要回氣，一度跌逾百點，低見12051，收報12123，跌43點，成交就縮至97億元。
中華煤氣（003）近期頻頻回購支持股價，噚日管理層打開口牌，話會斥資數億元來進行回購。假設回購金額為5億元，回購價每股13-14元計，將可回購3572-3846萬股。唔知中煤會否好似01年咁，向小股東提出大型回購建議呢？
中煤有份的西灣河嘉亨灣就快開售，一波估計平均呎價5500元，可為中煤帶來15億元稅前盈利。中煤搵咁多錢，如果唔用嚟回購，相信會慷慨派息，股價自然有支持。中煤周一回購110.5萬股，每股作價介乎12.75-12.95元，噚日收13.20元，升1.9%，成交1.135億元。
華普智通（8165）原本定於昨日下午3時正召開股東會，表決更換核數師。點知傳媒於會場門外等候多時都未見開始，之後話管理層因有要事在身，股東會已提早在上午舉行，管理層家陣唔得閒見傳媒。其實管理層見唔見傳媒事小，最大件事係公司冇理由話改就改，阿虎翻閱所有公司通告，完全冇通知過股東更改股東會時間。究竟呢間公司發生乜事呢？阿虎真係有啲驚，最慘就係公司股份已暫停買賣，股民欲沽無從。
新海能源（342）上周四股價急挫，管理層急急腳向傳媒及財經界解畫，大股東及惠理基金近日又入市增持，但消息刺激有限，噚日最多升過2.7%至0.115元，全日則收0.112元，冇升跌。惠理基金的金手指效應似乎開始減弱。
阿虎