港島區立法會選舉選情激烈，六個議席至少有五張名單十幾個人爭，獨立候選人范徐麗泰宣布參選當日，就以一句批評特首「先天不足、後天失調」而得到傳媒廣泛報道，可以話成功出位。
噚日范太同記者傾開，並唔介意報章話佢「狠批」阿董，自己只係有嗰句、講嗰句，但佢對民主派就忍口好多，雖然話自己唔會喺政改問題上「挾民意以令中央」，但死都唔肯評論民主派要中央收回否決普選決定嘅行動。
至於勝算，范太話頭四席應該係余若薇、何秀蘭、楊森同馬力，范太喺六月尾做嘅民調睇到自己嘅支持率有11%，可以力爭第五席，至於第六席係排民主黨名單第二嘅李柱銘同民建聯蔡素玉之爭，范太笑住話，媽田好有吸引力，不過民建聯嘅支持者多數唔答問卷，支持度成日被低估，蔡素玉又好勤力，都有機會咁話。
范太預備動用唔超過一百七十幾萬做選舉經費，其中自己出五十萬，其實即係老公范尚德出，因為兩公婆冇計，其餘三分二就多數向商界朋友募捐。
（圖）范太嘅新選舉總部月租只需萬幾蚊。
傳真︰2623-9278
電郵︰