窩輪市場，好耐以來，最多人買賣嘅係恒指輪。昨日10大成交金額窩輪，7件係恒指輪，總金額3.8億元，佔大市總成交近4%。
炒賣備兌及認沽輪，免印花稅，經紀玩埋一份，自己賺自己佣金，幾乎個個價位都係啖啖肉。經紀買入後唔對路掟番出去，最多蝕幾個菠蘿包。如果有統計，恒指輪有幾多係經紀自己玩番，相信比例唔細，當然亦有相當部份係發行商自己買賣。有啲人，炒一隻恒指輪，一日轉幾次身。
噚日7大成交金額恒指輪，逐隻睇。恒指Call輪2153（凡係「2」字頭代表出爐冇耐）明年1月尾夠鐘，輪價19.6仙，溢價11.1%，槓桿率25.8倍。2136喺12月尾到期，輪價17.2仙，溢價6.7%，槓桿率16.4倍。9082喺12月夠鐘，輪價17.6仙，溢價5.5%，槓桿率15.3倍。9952喺10月尾到期，輪價7.5仙，溢價9.1%，槓桿率53.9倍。
恒指Put輪9581喺11月尾夠鐘，輪價16.3仙，溢價6.1%，槓桿率14.9倍。9777喺9月尾到期，輪價19.5仙，溢價3%，槓桿率14.5倍。9956喺10月尾到期，輪價14.9仙，溢價5.6%，槓桿率22倍。
炒輪者都知道，睇好大市買Call，睇淡買Put。上便大批數字，睇到頭昏腦脹。計我話，買Call揀9082，買Put揀9777，兩者溢價較為實際。乜嘢時間做嘢？跌一二百點時買Call，升一二百點時買Put。
章盛