楊永強落台，特區政府同老左條氣唔順，連日來透過親中喉舌，拜神唔見雞大罵「係咪人頭落地先至肯罷休？」
真係好笑。「高官問責制」五個字，又係佢自己親口講嘅，一鑊沙士，死成三百人，履行問責，佢又話「人頭落地」，將「高官問責制」嘅承諾血腥暴力化，直頭當港人係白癡。
大陸沙士，胡溫連炒兩件：衞生部長張文康落台，再陪埋北京市長孟學農。孟學農係胡溫頭馬，上任得嗰三個月，照特區政府嗰鋪反智嘅講法：就係啱啱坐上個位，「磨合」尚未成功，加埋前朝老江同李鵬班底作梗，唔肯合作，咁又點解一定要孟學農亦「人頭落地」？
懶人治港、蠢人治港，一鑊衰完又一鑊，事後梗係用一套廢話、蠢話嚟百般曲解。
總之就係唔認數，乜都唔關佢事，只係彭定康衰、民主派惡、美國勢力從中破壞，五十萬人大遊行嘅都係刁民，自己一啲責任都冇。
嗱，楊永強落台，好多廢話重收唔到掣。親中保皇黨民建聯，話要設多一個「副局長」。局長之下，經已有個常秘，打橫設多個副局長，架床叠屋，要支多一筆人工，分分鐘又做埋局長嘅受靶替死鬼，邊個蠢到會肯做？除非呢一執「副局長」係民建聯想益自己友：例如陳鑑林可以做民政事務局副局長，蔡素玉做衞生福利局副局長，到時一問責起上嚟，就可以上卸局長、下賴常秘。
由於太過反智，連中央政策組頭目劉兆佳都頂唔順，話長遠要增加問責官員，但一切「言之尚早」。大陸都講緊精簡機構，特區政府重想開一層肥膏位，跟住下低公務員就齊齊咳人工。梗係「言之尚早」咧，跛腳鴨政府都只剩番三年唔夠，一早就殘晒，重有乜嘢搞作得出？
日前有消息指曾慶紅八月親來香港慶祝鄧小平百歲冥壽，點知中聯辦肥高又高調否認。自從去年7.1之後，中聯辦正式嗰條線靜咗好多，特區問題由外交部駐港專員楊文昌講得好多。中方又話特區問題係中國內政，講嘢又搵個外交官出聲，唔怪得美英時時要有反應，因為你搵個外交專員講，即是講畀國際社會聽，唔怪得英國外相發表報告，指摘中國干預特區內政，行為與中英聯合聲明不符。呢番說話好嚴重。
紀念老鄧百歲？老鄧最蠢就係將中英聯合聲明攞去聯合國登記，搞到今時今日，特區民主政制，名正言順咁變咗一項國際協議嘅主要內容，今年八月，國家領導人紀念老鄧，燒溪錢嗰陣，記住燒埋份中英聯合聲明落去畀老鄧過目，然後一齊嗌：「小平，您好──胡咁塗！」
傳真︰2623-9278
電郵︰