發展商近期夥拍銀行，提供九成半按揭促銷，二手樓業主為咗吸引買家，惟有變招迎戰。祥益地產分行經理黃振文話，業主自費翻新單位，並減價招徠，方法有效。
黃振文話，屯門大興花園一期一座低層H室，租客搬走後，業主斥資七萬幾，裝修過間屋，包括翻新外牆、重鋪地板、更換廚櫃及假天花，再降低叫價三個巴仙，終以八十四萬成功沽出，每呎逾千五，高市價五巴仙。業主一年前以六十萬買入，計落執十幾萬。同類冇裝修單位，成交價八十萬左右。
呢類有裝修單位，買家一向都幾受落，只要價錢啱，就好易成交。屯門近期成交，逾一成都係屬於呢類個案，大部份係投資者貨。
甲級寫字樓上半年吸納百二萬呎，令到空置率從高位回落，但實情係咪咁好景呢？睇吓仲量聯行《香港經濟透視》一文後，或者有答案。
報告話，有愈嚟愈多大租戶，預早租用在建中嘅商廈，出現使用與新租樓面重叠嘅情況，形成使用率高估。
同時，租務查詢雖然多咗，但都係屬於現有租戶搬遷，以及轉租更優質單位為主，新租客並唔多，大部份重係小型企業。
不過，仲量聯行黃志輝話，寫字樓需求與經濟表現息息相關，一般落後經濟步伐半年至一年，因此舊年下半年經濟反彈，寫字樓需求會喺今年下半年反映。
迹象顯示，企業擴充，估計隨着多餘樓面減少，以及企業維持有盈利，對商廈需求會輕微增加。
恒基西灣河嘉亨灣，係本月矚目大盤，地產代理都靠佢食胡，所以積極備戰爭客，中記話明，會用五十萬做宣傳費用。
為咗照顧駕車人士，用三十萬租咗隔籬安泊停車場，等有興趣買家唔使為搵車位而煩惱。個場有六十個車位，租期到九月底。
中記重話，喺灣仔至小西灣，遍設二十二個指定銷售中心，方便買家查詢資料，又準備十二萬宣傳單張派畀準買家。
世邦魏理仕余錦雄話，沙士以來，投資者購買商舖，願意接受較低收益，令到回報由七厘降至四厘或以下，預計下半年租金重可以升些少，部份旺區就升一至兩成，但回報仍然維持四厘左右。
旺區舖位呎價現約二十萬，呎租高見八百至一千，全亞洲最高。佢補充話，呢類都係百零呎嘅細舖。
另外，部份外資將年初購入嘅商舖趁高價減持，形成市場由本地資金主導，主要係在內地有投資嘅廠家，以及投資者。
中區甲級商廈市道近一兩年，一直受巨無霸國際金融中心二期影響，隨着國金二期出租率不斷上升，市況亦見起色。
屋之島黃志強話，國金二期空置率，由舊年九月嘅十一點三巴仙，一直降至今年六月嘅一點九巴仙，足足少咗九點四個百分點，認真厲害。
屋之島上半年促成九宗國金一及二期租務成交，平均呎租約三十五至四十蚊。
蘭西
電郵地址：
