梁詠琪（GiGi）與劉德華、李克勤及女友盧淑儀，前晚相約打保齡球。球技麻麻的GiGi擺出大鵬展翅的「碌齡」姿勢，頗為騎呢，而克勤和盧淑儀雖輸波，但仍主動埋單。
前晚位於黃埔的保齡球場可謂星光熠熠，梁詠琪及其孖生胞弟、李克勤及女友盧淑儀，約同劉德華及幾位工作人員打保齡，經過兩小時的決戰後，終由華仔成為大贏家，大勝GiGi及克勤。
前晚十時許，大夥兒自攜私家波到場，GiGi未有與男友鄭伊健同行，反而找來胞弟作伴，早前有報道曾指GiGi的「碌齡」姿勢肉酸及球技甚差，就前晚所見，GiGi的球技已略有進步，但其打球姿勢仍很騎呢，還擺出大鵬展翅的姿勢。
球技同樣平平的盧淑儀，前晚卻未獲男友克勤在旁指導，反而華仔主動向她教授球技，其實克勤打保齡的技術也算不錯，惜因華仔太強，故只好成為對方的手下敗將。
至凌晨一時，眾人盡興而回，華仔、克勤及GiGi爭着埋單，結果由輸波的克勤及GiGi結帳。現場還有十多名fans在旁為華仔打氣，就連球場的工作人員亦要求華仔在保齡球樽上簽名留念。
事後問到克勤戰況如何？他笑說：「唔好提啦！」再問他是否由華仔勝出？克勤即說：「梗係華仔勁啲啦，佢係師傅嚟㗎！」
採訪、攝影：娛樂突發組
