郭羨妮、佘詩曼、陳敏之同黃宗澤𠵱家身在北京嘅飛騰製片廠拍攝無綫新劇《翻雲覆雨》，不過呢套劇就真係屋漏兼逢連夜雨，因為早排北京有大風雨，豪雨已經將部份搭建嘅道具房舍沖毀，就連房門都飛甩埋，而陳敏之就因為感冒而持續發燒，重感染到同劇嘅郭羨妮、阿佘同黃宗澤都病埋㖭。
呢次劇組嘅發病源頭嚟自陳敏之，佢本來患上感冒，後來重發燒，燒咗成十日，陳敏之前晚同馮仁昭傾開電話時，就話估計自己係水土不服而引起感冒，佢患病後，除咗開工之外，已經匿入房以免傳染人，佢話自己同阿佘都冇乜對手戲，所以都唔明點解會感染到對方發病。
陳敏之喺患病期間，不時忽冷忽熱，都咪話唔辛苦，佢喺當地都有睇醫生，同埋服食帶嚟傍身嘅成藥，但當佢食晒啲藥後，郭羨妮就好仗義咁將自己帶嚟嘅藥物拎畀佢食，所以陳敏之好多謝對方幫忙，陳敏之重話佢媽咪好擔心，專登速遞咗啲成藥畀佢，好彩佢𠵱家都已經好得七七八八。
許冠文噚日到商台接受訪問，獲封為太平紳士嘅佢話九月會有一個正式授勳儀式，到時特首董建華都會出席，問經常寸政府嘅許冠文見到董伯伯會唔會尷尬？佢話：「我同董伯伯好熟，亦都喺禮賓府做過棟篤笑，董太重係笑得最大聲，而且董太重同我講過：『唔怕，我哋好有幽默感，玩之嘛，咁香港先有言論自由，全世界都係搵總統講笑啦』，董太重話我講完後請我飲酒㖭。」
關之琳自從纖體成功之後，毫不吝嗇大騷美好身材，佢早前拍攝新一輯纖體廣告照時，就着上一件兩側開空嘅迷你裙，展露修長美腿。喺鏡頭前，之之擺甫士表現得相當自然，但原來佢為咗令線條更突出，拍攝嗰陣就全靠用單手支撐住自己嘅身體，都幾嘥力㗎。
譚詠麟（阿倫）噚日去咗青衣城出席捐血活動，有個男歌迷重帶埋兩大袋零食送畀阿倫，佢一見阿倫時重激動到喺地上連跪三次，搞到阿倫不知所措，喺佢身旁嘅陳文媛都被男歌迷嘅出位行為嚇到目瞪口呆，咁啱克勤啱啱到現場，阿倫即刻將個波掟畀佢，叫男歌迷獻唱《舊歡如夢》畀克勤聽，阿倫先可以甩身咋。
由張藝謀執導，劉德華、章子怡同金城武主演，投資近二億元嘅《十面埋伏》，喺上星期四一開畫票房就衝破咗一百三十萬。不過《十》片喺內地嘅成績就更加厲害，短短上映三日就有五千五百萬人民幣票房，超過咗《英雄》嘅紀錄，成為內地有史以嚟頭三日最高票房嘅電影，認真犀利。
林文龍同郭可盈噚日喺將軍澳電視廣播城古裝街拍攝《十兄弟》，對於有報道話黃日華息影，同樣係明星足球隊嘅波友林文龍就話真係有迹可尋，佢話：「見佢世界盃同歐洲國家盃都話推晒啲嘢唔做嚟睇波，佢唔使做，我會打電話恭喜佢。」不過馮仁昭事後聯絡黃日華就證實原來係一場誤會，有啱嘅角色佢都會繼續拍戲嘅！
