吳鎮宇前晚拍攝新片的一幕跳樓戲，其替身代他上陣時受傷送院，鎮宇等演員及後即拜神求工作順利。談到無綫要藝員超時工作，他力斥無綫「離晒譜」，又謂以前曾往勞工處求助，但最終沒有採取實際行動。
吳鎮宇、陳奕迅（Eason）和容祖兒前晚在灣仔拍攝電影《神經俠侶》，鎮宇在片中飾演精神病患者，前晚拍攝他從二樓跳落街追捕強姦犯的戲份時，找來替身上陣。不過替身從二樓跳下時，不慎撞傷頭部送院，幸無大礙，眾演員其後立即拜神，以求拍攝順利。
鎮宇說：「呢個鏡頭唔使見樣我先搵替身，都要畀錢人賺嘛，見唔到樣都自己跳，咪好笨！上次我拍《心寒》俾貨車撞都自己做，幾有型呀，我買咗保險㗎。」提到無綫藝員拍劇時常超時工作，鎮宇說：「呢個問題好長久，都唔係人嚟，離晒譜，唔理你開幾多個鐘，藝人頂唔順咪自己病囉。我拍《衝上雲霄》時都準時開工收工，協調唔到咪自己解決囉。我同TVB有合約時曾經去過勞工處度問，佢哋話可以告，但我冇咁做。」他又謂試過超時工作後駕車，結果與巴士相撞。
Eason到場前已得悉有人受傷，故他先拜神才換衫開工。Eason表示剛往歐洲度了兩星期假，前晚才首日復工。問他是否已與英皇滿約，Eason避談說：「我𠵱家心情好free。」
Eason表示在英國被人索取簽名，卻被認錯是鄭中基，他說：「我話我唔係鄭中基，問佢究竟知唔知我係邊個？佢猛話知，最後我簽咗周潤發個名畀佢。」Eason下周二便三十歲生日，他表示會靜靜地在家度過，不會請朋友返家慶祝，因朋友都抽煙，怕會影響懷了孕的徐濠縈。
採訪：魯萍 攝影：何國豪
