美國卡通王國迪士尼今個暑期將會推出全新動畫《至叻皇牛黨》，入面出現嘅豬仔同牛牛角色好生鬼有趣，加上唔少搞笑動作場面，相信呢套卡通下個月十二號上映嗰陣，必定會吸引唔少fans入場。
《至叻皇牛黨》講述樂重天農場因為主人欠下巨款面臨倒閉，一班住喺農場嘅動物，為咗逃過被拍賣同變成美食嘅厄運，決定替農場「撲水」度難關，佢哋知道飲水鎮正懸紅七百五十蚊緝拿惡名昭彰嘅偷牛大盜，於是決定離鄉別井，展開一次最「牛精」嘅捉賊大行動，實行奪取獎金還債。
呢班搞笑農場雜牌軍，當中包括三隻患有過度活躍症嘅儍豬，佢哋雖然好易俾人𠱁，但勝在識功夫。除咗呢三隻可愛嘅小豬之外，重有計仔多多嘅招積兔、夢想成為警惡懲奸英雄嘅馬仔同埋牛牛姊妹花，個個都好出位。
迪士尼卡通片當然唔少得歌舞場面啦，今次《至叻皇牛黨》由八屆奧斯卡最佳配樂得主亞倫曼堅（AlanMenken）操刀，佢曾經炮製過《美女與野獸》同《阿拉丁》嘅配樂，至於監製亦曾經製作過《獅子王》呢齣全球賣座經典動畫，又睇睇能否再創佳績。