港股高收，恒指進帳107點，最大功臣係市值最大嘅滙控（005）與中移動（941）。
恒指守穩萬二，落唔去，再上，重磅股有份郁。滙控與中移動Call輪揀啲嚟炒。
滙控Call輪超過70隻，要揀唔算太難，兩個原則，有交投，溢價細，最好咪太短期。正路係9783，9月尾到期，輪價64仙，溢價0.3%，槓桿率18.1倍。想搏殺，揀9640，9月初到期，輪價25仙，溢價1.3%，槓桿率46.4倍；食得鹹魚抵得渴，願賭服輸，睇錯正股方向嘅話，揸9640會輸得好勁，當然滙控移動方向若正確，賭9640會贏成條街。有1件重厲害過9640嘅，就係9629，已屬末日，下月初夠鐘，輪價10仙，溢價0.9%，槓桿率116倍，有權贏兩三倍，亦有權跌到冇得剩。
中移動Call輪揀9813同9979。9813喺12月初玩完，輪價25.5仙，溢價3.9%，槓桿率8.8倍。9979喺11月中到期，輪價26仙，溢價4.7%，槓桿率8.7倍。中移動Call輪有好幾隻槓桿率幾十倍，勁爆，但溢價幾十巴仙，向佢哋打主意，輸多過贏。
滙控好，恒生（011）都有機會跟埋上去。恒生Call輪9748係大升大跌對象，9月尾到期，輪價32仙，溢價2.2%，槓桿率30.9倍。呢件好過9782，9782幾乎同期夠鐘，輪價27.5仙，溢價3.8%，槓桿率36倍。
章盛