港股噚日再升，恒指接近高收，報收12166，升107點，期指則低水10點，升降指數呈強，後市看好。上周五美股市後期指高水，周一美股有機會出現反彈，或會扭轉弱勢。
大市今次調整，低位係上周五的11862，並出現單日轉向，噚日再上，恒指重越10日線（12129）同20日線（12113），確認升浪開展，短期阻力在月初高位12345水平，中期目標起碼見13500。由8月開始，會有幾個月大旺市。
國企升勢更勁，國企指數收4401，大升108點，升幅2.5%。江西銅業（358）上番月初的3.975元高位，升破4元指日可待；上海石化（338）高收2.85元，已創出近兩個多月來的新高，以量度升幅計，目標指向3.25元。
好多國企已由5月中的低位大幅回升，例如江銅就升咗94%，兗煤（1171）升86%（創出上市新高），鎮海煉化（1128）升84%；鋼鐵股升幅較小，但馬鋼（323）都有52%，重鋼（1053）升51%，而鞍鋼（347）則有57%。但亦有少數「未升到」嘅，例如中國鋁業（2600），同5月低位3.425元比較，只升得24%，安徽海螺（914）亦升得29%。不過，落後股始終會發力，從後趕上，噚日中鋁就高收4.225元，升3.7%；海螺搶上8.7元，升4.8%。
美林證券「新鮮熱辣」出咗份中鋁嘅報告，因應鋁價下跌同成本上升，而調低中鋁嘅盈利預測同目標價，但即使係咁，盈利仍然好勁，而目標價重係好吸引。
報告將中鋁04年（12月結）盈利預測下調11%至80.9億元人民幣，05年盈利下調9%至108.3億元人民幣，即每股盈利分別為0.735元（折0.693港元）同0.984元（折0.928港元），04年預測PE6倍，05年更低至4.5倍。
美林同時將中鋁目標價調低10%，由7.7元下調至7.0元，現價入市，預期升幅有65%！本欄上月底推介中鋁時，04年每股盈利預測僅0.49元，目標價5.8元。
中鋁股價已重上3條平均線之上，升破4.5元的雙底頸線阻力，大升浪即可確認，第一個目標係5.5元。
郭兆誠