即使你有Isabella咁青春無敵，又或有吳彥祖咁型，都未必可以打入娛樂圈，皆因加入娛樂圈要識門路，要講關係！但係無靚樣，甚至已經年過三十，有時亦無問題；只要你「識死」、「肯撻」，重要有「質地」、有性格，一樣可以透過加入武訓，循正途殺入娛樂圈！今次訪問主角黃燕強係最佳例子，示範點樣做好預備，把握娛圈無窮機會！
記者：李玉蘭
攝影：陳盛臣
黃燕強坦言因為四年前生意失敗，才膽粗粗加入電影圈。「由老闆變到一無所有，嗰時都三十歲人，成個人無晒方向！碰啱政府資助成龍大哥同新城電台合作搞特技人訓練班，雖然自知唔夠高唔夠俊，但勝在鍾意電影，淨係韓國套《生死諜變》都睇咗十次八次；心諗一套戲都有好多唔同角色啫，咪拍吓心口上！」結果，千二人爭三十名額，他都被選中。經半年訓練，更獲簽約做起武訓來！
由畢業到現在短短四年，黃燕強拍過八十多套電影和二十多個廣告，「簽約做武訓係無底薪，但係每接一組戲（九小時計）會有$800收入，入行以來試過每月賺三千至二萬多。」外行人加入影圈，樣樣都新奇，「原來活躍嘅武訓只有十零個，佢哋可能呢套戲做差人，下一套就變賊，可以話係嚴重缺乏新面孔！加上電影業開始復甦，開工比兩年前多近三倍、香港電影近年頻獲國際殊榮、CEPA又有助香港電影打入國內市場……種種因素，令我哋一班行內人決定開辦武訓班，以實用速成角度教授，以解救缺人之患。」透過武訓班學好基本功後，加埋片場工作人員實戰教路，多能應付基本拍攝要求。
動作片始終是香港電影主流，有二十三年動作指導經驗的楊菁菁說：「通常一套動作戲係武師行最前，第二排係武訓，最後至係特約。每套動作片都要十幾個武訓，都好需求人手。晉升機會係武訓到武師，再上動作指導、導演；如成龍、唐季禮、劉家良等！」近年不少國際電影更由香港人做動作指導，如《標殺令》、《22世紀殺人網絡》。所以有功夫根底、十來歲就加入學做武訓，相信更易有美好前途！
課程資料
動作演員（武訓）訓練班
主辦：武導館
內容：基本武術訓練、演戲技巧、不同時代的動作反應、在電影中用槍姿勢及安全須知、「威吔」使用及安全、專業操守等。
考試：完成課程後，可獲頒發證書；成績優異者可獲簽約，以推介給各大電影公司安排試鏡及電影拍攝工作。
導師：在職及領有導師牌照的電影特技人。
學費：$3,800（共25堂，每堂2小時）
資格：性別不拘、體格健康、對電影有興趣者。
開課：八月上旬
查詢：62898622
網址：
武師大家可能較熟悉，但武訓係乜東東？簡單來說，武訓是在電影中擔當動作反應的角色，如中槍要點死法、被打要點撻法等。動作難度是武師或特技的次級。重未明？即刻過你兩招：
1.撻要睇環境
武訓經常跟主角對打，不乏表演機會。入行八年的動作演員兼導師JudePoyer話：「主角打你一下，想即時做好閃避、成個彈起、瞓低倒地全套連環動作，就要事先學好釣毛、拋俯、揪躀等常用幾套撻法！重有，為咗好好保護自己，可以因應環境、戲服，喺衫下做好防護措施，避免受傷！」
拍過《飛虎》、《大事件》和《新警察故事》的阿戚，經常在電影身兼數職，在課程中主要教揸槍，「比如警察揸槍就一定要穩陣，所以多數雙手揸！賊因為唔使向上頭寫報告，所以可以單手又得，扮型又得。但不論兵定賊，基本功就係上彈夾時要用手心按槍底，上膛會用眼瞄吓槍管係咪真係有子彈，握槍要用虎口位。重有，被警察用9mm彈射中應表現出郁一下都痛死嘅反應，反而中5.56mm高速子彈，因為子彈未必留喺身，反而要死得無咁辛苦！」
