ATLUS鎮店RPG《真．女神轉生》系列，由於系統複雜、難度頗高，故此作品多數叫好唔叫座，連最新重頭作《真．女神轉生III》銷量都只係平平。開發商決意打破宿命，放棄麻煩多多嘅仲魔交涉系統，以外傳形式推出《DigitalDevilSaga》，故事節奏明快、屬性戰鬥刺激，絕對係近期RPG首選。
記者：徐影龍
遊戲類型：角色扮演
對應機種：PS2
遊玩人數：1人
行貨售價：$390
開發商：ATLUS
(c)ATLUS2004
故事講述存在喺Junkyard世界嘅六大部族，互相仇視及制衡，主角Serph屬勢力最弱嘅Muladhara，一次行動中意外感染「蓓雷」，從此擁有變身數碼惡魔嘅能力，幸得從天而降嘅謎之少女Sera，以歌聲壓制眾人魔性。雖然《DigitalDevilSaga》屬外傳作品，不過ATLUS一樣落重料，除沿用《真．女神轉生》系列嘅鐵膽──金子一馬繼續擔任人設外，動畫部份重有巨匠級嘅板野一郎負責，音樂則交由目黑將司，聲優方面更搵嚟桑島法子、冬馬由美擔任，聲、畫質素絕對係頂班級數。
踢走仲魔交涉系統，冇得招攬魔物幫拖，改為主角們自己變身數碼惡魔應戰。今集戰鬥系統相當之出色，人類與惡魔形態自由變換，由獵食攻擊到魔法，都相當之華麗兼有氣勢。戰鬥系統改良自《真．女神轉生III》，以行動方塊代表己方活動次數，若果揀啱屬性攻擊（如水魔法對付火系惡魔），又或出現「會心一擊」，可獲額外獎賞多一次行動，變成一回合攻擊多次嘅局面。相反若揮空或用錯屬性，就會倒扣行動次數，令敵人提早攻擊，戰略性大大提高，最緊要係易上手，唔似《XenoSagaEP2》咁麻煩。
雖然戰鬥中不時學會惡魔合體技（Linkage），不過咪以為唔識魔法嘅人類形態冇乜用，配合隊中一名惡魔，就可使出相同屬性嘅槍擊連攜技，如一回合使出三次火系槍擊，面對水系首領級敵人，都可快速了結。
遊戲系統另一有趣之處，就係惡魔升級系統「曼斗羅」，情形有點類似《FFX》嘅錫菲羅盤。每當戰鬥完畢，除升等級用嘅經驗值外，重有一項名AP嘅數值，作用係提升惡魔技能之用，儲滿後就可學懂該曼斗羅嘅魔法同技能，之後再向另一技能曼斗羅進發，如雷仙變雷王，再變真雷曼斗羅等，又或學定黃泉曼斗羅嘅復活魔法，總之想要咩技能自己話晒事。
遊戲中有一偵察敵人屬性嘅技能，若屬性相同嘅隊員就要忍手，齋以物理屬性嘅「獵食」作攻擊，又或變身人形，使出有利屬性嘅槍擊。舉一反三，針對敵人屬性，預早施用相同魔法防禦，就可提早結束敵方行動回合。
愈高級嘅曼斗羅，所需價錢及升級時間均倍升，若遇着唔夠錢而又AP爆晒燈，為免浪費，大可轉學其他低級曼斗羅，如初級回復、異常狀態等。不過盡量唔好修練衝突屬性嘅技能，如火、冰屬性，可改為火、風嚟修練。
SCE喺今個暑假特別製作咗一批至潮T恤，白色底襯上DaulShot上嘅招牌按掣「△○×□」，相當之搶眼，重搵嚟人氣組合SKY嘅Yani做示範。SCE重預留咗50件畀《蘋果》讀者，只需手持今日本版，到尖沙嘴PS2PlayGround，就可免費換領一件，先到先得，送完即止。
換領點：PS2PlayGround
地址：尖沙嘴海運中心地下43至44號舖（玩具反斗城側）
