前排北京大學、清華大學來港招生，會考有4A或以上嘅「尖子」，就可以申請入學，當然要過面試一關啦。報紙話個十A尖子俾清華取錄，其中一個又已經得到芝加哥大學取錄，好似係要讀生物化學嘅。尖子如何取捨，我哋唔知，讀書叻之人，去邊度都有學校收，唔使戥佢哋擔心。
不過一位教授睇到新聞，立即飛鴿傳書嚟，叫左丁山勸阻啲尖子唔好去北大、清華。吓，自己何德何能呀？教授話：「我喺美國畢業，上過北大、清華、復旦演講、考察；老實講，中央政府真係重點培養幾間名校，要捧北大、清華做哈佛、耶魯，但係目前嚟講，北大、清華同美國啲一流私校嘅水平，相差太遠。嗰位尖子如果揀去北京而唔去芝加哥，而且讀生化㖭，就一定錯，千祁唔好制。𠵱家讀科技、科學，唔去美國，已經蝕晒底，芝加哥大學咁好嘅大學，唔去就更加笨。內地嘅名校，可講係一流學生、二流教授、三流管理、四流設施，同芝加哥大學邊度有得比？呢番說話，唔可以公開講，否則我冇咗回鄉證都似，講畀你聽，你可以寫出嚟！」
嗱！香港啲尖子，聽住喇嘞，求學唔係求關係，而係求知識、學做人，選大學嘅時候，不妨參考教授嘅說話。中國十三億人，尖子天才多到不得了，入到名校，唔使上堂，淨係自己讀都掂。但你哋有多一個機會，就係去美國增廣見聞，入一流名牌大學，有名師指點，差好遠㗎。著名學者何炳棣就係好彩喺一九四五年去咗哥倫比亞大學，先至得成正果啫。