民主女神余若薇嘅「吸星大法」太犀利，民主黨就好擔心，驚余小姐吸走晒啲民主愛國票，搞到連前主席李柱銘都輸埋，媽田個仔Joey見到咁，好想親自幫老竇做選舉經理。
媽田同太太去咗澳洲散心玩，要到星期三先至返香港，Joey就留守香港，幫老竇選舉度橋。但係聽講民主黨想搵楊森個妹楊美華、或者阮品強做媽田佢哋嘅選舉經理，撮合唔到呢對父子兵，Joey要幫老竇手，或者可以諗諗加入民主黨條隊做樁腳。其實Joey又唔使擔心，睇吓7.1媽田咁受歡迎就唔使驚，佢實會吉人天相、高票當選。
有人話，媽田咁有危機，都係因為排頭位嘅楊森支持度低，只係得百分之四多啲。不過楊森嘅情況，又的確激勵咗唔少民主派戰友。民協副主席廖成利噚日同八方講，自己喺九龍西嘅支持度雖然只得百分之三，但楊森做咗咁耐都同佢差唔多，佢重要係啱啱落九西做嘢，所以百分之三支持其實唔低，相信衝刺一輪後，一定可以當選。
傳真︰2623-9278
電郵︰