古巨基於明天揭幕的書展推出Kubi漫畫書第二集，嘗過做漫畫家，基仔今次又自資三十萬元，推出一系列Kubi公仔的周邊產品如T恤，更會進軍日本和美國市場。
古巨基繼去年推出親繪的Kubi漫畫後，反應十分理想，今年他將於書展及漫畫展推出Kubi漫畫第二集。眼見其創造的Kubi公仔大受歡迎，基仔順勢推出周邊產品包括五款T恤、四色電話繩、三款貼紙及咕𠱸。
基仔今次自掏腰包三十萬元作成本，他表示做老闆與當歌手或是漫畫家的感覺很不相同，他說：「我當初出漫畫諗住了咗個心願，細細個就想出書嘛，冇諗過反應咁好，重不時收到歌迷自己做嘅Kubi咕𠱸或者飾物，我咪諗不如發大嚟搞，自己出產品，遇啱WingShya（著名攝影師夏永康）都好鍾意Kubi，於是同佢合作一齊設計囉。」
Kubi產品除了在明天揭幕的書展售賣外，月底的漫畫展更有一個專屬Kubi與基仔的攤位，基仔說：「個攤位設計係以迷彩為主，因為我好鍾意呢種圖案。其實Kubi網站都可以買到。」
基仔自言今次甚有信心，他說：「冇諗過各樣嘢可以咁順利，我相信Kubi嘅潛力好大，可塑性又高，WingShya重簽咗佢去日本同美國發展，由冇到有自己創造一盤生意，真係要花好多心機，但個過程好開心好有滿足感。」
近日基仔又要宣傳月底推出的漫畫概念新碟《大雄》，他說：「上次出碟，滿腦都係打機，今次就乜嘢都係漫畫，張碟好似漫畫書咁。」
採訪：李珮洳 攝影：陳慧安
場地提供：Hair
髮型：Nichol@Hair
