中央當然想阻止泛民主派喺今次立法會選舉攞更多議席，有消息話，政府為咗防止「保皇黨」候選人自相殘殺、分薄票源益咗民主派，打算「利誘」部分勝算低嘅保皇人士退選，獎品包括「年薪過百萬之政府官職」。噚日更周街傳聞，九龍東可能威脅陳鑑林嘅馬逢國、同埋喺新界西可能威脅譚耀宗嘅呂孝端，都係政府利誘對象。
馬逢國同八方講，絕無其事，但佢始終唔講，究竟去唔去馬九龍東。講開馬逢國，佢第二屆係從選委會晉身立法會，今次選委會被取消，一直佢都話想加入九龍東直選戰團，但最近又有消息話佢想縮沙，據聞，阿馬有位家人患病，阿馬十五十六，又想參選，又想照顧家。
睇噚日嘅表現，記者問親馬逢國有關選舉嘅問題佢都封口，呂孝端就好興奮，同人講積極考慮參選，重講埋名單頭三位有乜人，睇怕都唔似會退選。
（圖）馬逢國（右）冇講會唔會參加直選，而呂孝端（左）就睇嚟好有興趣加入戰圈。
傳真︰2623-9278
電郵︰