左麟右李撥大葵扇
馮仁昭四圍超：黃伊汶、余文樂金邊拍拖

譚詠麟（阿倫）、李克勤、黃家強同黃伊汶等前日去廣州宣傳「愛心之旅」，之後佢哋會探訪當地嘅孤兒院，然後再去柬埔寨金邊嘅孤兒院，但克勤同阿倫只會出席廣州之旅，余文樂同緋聞女友黃伊汶就會參加晒兩個行程。

「我八卦咗好耐」
余文樂同黃伊汶傳出緋聞後，經常成為友人笑柄，克勤話：「可惜我去唔到，如果唔係睇吓佢哋係咪拍拖，我八卦咗好耐。」阿倫亦附和話：「去到金邊咁遠，都冇狗仔隊，應該可能會發展吓。」黃伊汶就話：「遲啲去柬埔寨探訪，我聽聞吳哥窟好靚好浪漫。」問佢會唔會同余文樂一齊去玩吓？佢話：「唔提佢，費事又寫佢。」
黃伊汶重自爆簽咗藝能做佢嘅經理人，馮仁昭估計係佢余文樂穿針引線嘅，而且既然兩個都俾人影過出雙入對，點解唔大方啲承認，拍拖都唔使偷偷摸摸。

陳沛嘉宣傳Spa歎世界
模特兒陳沛嘉（Balia）之前到深圳宣傳鄭家純投資嘅棕櫚島，重着比堅尼歎Spa。Balia話同呢個樓盤已第三次合作，佢話：「之前有宣傳過旗下嘅高爾夫球會同埋婚紗攝影。今次個job好輕鬆，好似去泰國度假咁。」佢重透露自己每月大約會用六千元做按摩同Spa。

黃耀明客串主持《勁歌》
無綫嘅《勁歌金曲》聽晚嗰集會嚟個大改革，由於除咗何韻詩之外，重未搵到另一個適合嘅主持人選，所以無綫決定暫時搵住嘉賓主持去做，集集唔同人。馮仁昭聽聞第一集除咗許志安之外，重有黃貫中，而下星期已經落實嘅主持就有黃耀明同潘迪華，無綫𠵱家重斟緊顧嘉煇做第三集嘉賓主持，但成唔成事就未知。

徐若瑄新車撞的士
徐若瑄早排將自己架MiniCooper賣畀朋友，然後買咗部一百一十萬新台幣（約二十五萬港元）嘅開篷標緻206新車，但落地十日就撞車，認真大吉利是。小瑄話佢係上周六喺台北忠孝東路同架的士相撞，佢當時搵唔到經理人，就自行打電話報警。小瑄話當時佢打燈轉右，以為喺佢右邊架的士都係轉右，點知對方直行，咁咪撞囉。

劉浩龍立志生小球星
劉浩龍噚日去九龍灣展貿中心出席商台活動，佢話前日去大球場睇傑志對紐卡素場波，覺得好興奮，重話曾經諗過做足球員，但今世就唔得喇，因為已經做咗佢想做嘅歌星，所以惟有快啲生個小朋友繼承佢嘅志願，不過就要去外國踢，因為始終喺外國踢足球點都比香港球員矜貴啲。