恒基西灣河嘉亨灣噚日有兩個第一次，既係首度宣傳，又係主席李兆基孻仔李家誠初次現身樓盤活動，第一擊就下海遊船河宣傳。
鮮有露面嘅李家誠，噚日擔大旗，致辭介紹樓盤特點，但係面對大批傳媒，表現相當緊張，攞住份稿慢慢講，而且重係一字不改咁讀，經常講「這個樓盤」呢類字眼，似乎唔係咁自然。
不過，佢好落力話畀大家聽，嘉亨灣點樣可以成為港島住宅之最，包括樓層最高，同埋設於四十七樓嘅空中花園，重有最多元化會所，總算交到功課。
噚日係宣傳第一擊，喺海面睇完嘉亨灣外貌，發展商就準備咗架觀光巴士，載各大傳媒去現樓參觀，重親身上到去第三座六十五樓，睇吓個無敵靚景。
另外，喺尖沙嘴美麗華商場門口，發展商搭咗個諮詢站，放大型宣傳板，大賣物業海景。現場有職員派發宣傳單張及單位平面圖，即場幫有興趣人士登記資料，重話可以優先睇示範單位。
照咁睇，樓盤開賣，應該愈嚟愈近。
政府產業署五年嚟第一次推出公務員宿舍發售，首批六個渣甸山愉富大廈單位，原定上周五截標，但因颱風關係延期至昨日。
產業署雖然未有公布標書數目，但中原地產東半山營業董事蔡佩芳話，中記代客入咗約五份標書，標價每呎四千五至五千，即係出價九百幾萬至逾千萬。聽講，入標者以用家為主。
產業署標售嘅六個愉富大廈單位，位於A座三至十六樓，全部超過二千呎，連車位。除咗呢批單位外，政府重揸住二十七個愉富大廈單位未推出發售。
香港唔少善心人，最常見係捐錢畀慈善機構、買吓旗，但其實幫人有好多方法，富城屬下港島東區屋苑北角海峰園，及鰂魚涌栢蕙苑，參加由聖雅各福群會主辦「眾膳坊」慈惠計劃，向屋苑住戶收集乾糧、食米、罐頭等，透過社工轉贈予有需要人士，包括露宿者、低收入人士、單親及新來港家庭。
另外，富城最近推出定購湯水服務，供應上環帝后華庭、西半山豫園、灣仔李節花園、大坑光明台、海峰園及西灣河鯉景灣，每日不同湯款，事忙住戶唔怕冇靚湯飲。
時興隆去年底以低價買入嘅赤柱富豪海灣C段雙數屋，最近以月租十五萬租出，成為屋苑第二宗租務成交。利嘉閣陳詠嫻話，時興隆係富豪海灣首批買家之一，同歌星楊千嬅同期入市，當時呎價九千蚊有找，四千二百零呎嘅洋房，賣三千六百萬。
間屋過去九個月升值近五成，不過，時興隆買入作長線收租，唔輕易放售，加上租金回報率有五厘，短期內都唔會賣。
另外，市傳壽臣山道西四號洋房，以近五千九萬沽出，間屋四千呎，呎價近萬五。
發展商賣樓，不時要因應市場變化，提供唔同優惠促銷，有時係突然出擊，好似華懋咁，早前高調表明，為青山公路傲庭峰，及沙田碧濤花園買家，提供首兩年免息供優惠，但係原來佢哋粉嶺名都有相同優惠，華懋只係喺報章登咗個細廣告，宣布呢項優惠。
另外，粉嶺村屋全球麗庭，就話買單位送車位，同鑲一卡鑽石嘅十八K戒指，強調唔係普通碎鑽，呢項優惠，都係登廣告話畀買家知咋！
將軍澳維景灣畔錄得近千萬大手成交，買家一次過向發展商買入三個單位，包括兩個相連單位自住，另一個保留收租，共用八百五十三萬。
美聯郭玉滿話，買家為咗九月入讀調景嶺優才學校嘅小朋友，決定由西貢大網仔舊居，搬去最近學校嘅私人屋苑，而住慣逾千呎大屋嘅買家，就只有相連單位可以滿足到佢需要，最終斥資五百七十二萬，買入八座高層E及F室，最後一個內園景相連單位，面積近千四呎，呎價近四千二。
另一個單位就用咗二百八萬購入。
蘭西
電郵地址：
