七一大遊行已經過咗大半個月，老左條氣唔順，吟吟沉沉，拜神唔見雞咁嘅聲，一味話遊行人數冇五十三萬，而係一時二十五萬、一時又十九萬、十二萬。一啲街外好得閒冇乜嘢做嘅文人，亦扮晒客觀公正，一時話由美國太空衞星瞄落嚟只得十六萬，一時又話列根報道，有四十二萬，而碟仙請嚟毛伯伯嘅亡靈透露，又話有一百萬喎。
好心喇，世事日新月異，七一有幾多人遊行，一早就out喇，總之五十萬就冇走雞，已成定案，冇得上訴咯陰功。又係嘅，香港市民大覺醒，對於某啲人，就好似有一種再次受創傷嘅感覺，難免疑神疑鬼，有時飲泣吓，有時仰天呼號，喺極度震驚之後，精神狀態要有排先至調節番正常，香港人幫佢哋唔到，惟有希望佢哋節哀順變喇。
講到順變，輪到自由黨誓師，自稱工商界接受直選洗禮。田少、莎姐、丁午壽，齊齊殺落區肉搏。三人之中，除咗丁午壽個名，福祿壽呀咁，畀人一種好上一代嘅傳統感覺，田少同莎姐，港人都唔陌生。
自由黨口號，叫做「你的心聲我聽到」，又話WeShallWin，比起范太，亦太過保守。
人哋范太一出馬，即時兜腳勁踢中路，一句「阿董先天不足，後天失調」，簡直石破天驚。大家先至知道，原來范太唔聲唔聲，做立法會主席咁耐，冷眼旁觀，條氣亦暗中谷咗咁耐，連主席都睇唔過眼，一誓師就痛起飛腳，咁先至叫做競選。阿董都識得借楊永強人頭一用，范太又借阿董人頭一用，憑「七七事變」起朵嘅田少，最有民主本錢，寬衣解帶，點解重咁羞人答答？梗係一記黑虎偷心拳，中取老董，跟手一記猴子偷桃爪，暗鎮土共，登高一呼：「廢二十三條，全靠田少」，「唔怕蛇Gwai，有我Sa姐」，「丁午壽，要自由，咪當港人係壽頭」之類，咁就夠晒醒神進取。請啲大學講師做顧問，始終係悶蛋咗少少。
話時話，今年立法會若然有一批騎呢怪登場，就好似間大戲院，做開吳楚帆張活游啲道德悶蛋戲，都要換吓畫，畀一班諧星上場擔正，例如俞明、高魯泉、馮峯、蕭錦、檸檬、火星、大細眼、魚頭雲呀咁。若然大班肯參選，一定搞寸個局，加埋長毛、阿牛、詹培忠、謝偉俊，來年大鬧垃圾會，一個扯領呔，一個跳上啲吊燈打韆鞦，一個講講吓無喇喇大喊，有天山童姥，又有火雲邪神，洪七公加歐陽鋒出齊，咁就會齊齊提高民主質素，為二○一二年普選鋪路。
呀，重有，今年立法會大選，少咗毓民把拆喉聲弘揚正氣，始終好似過農曆年俾英國佬禁燒炮仗咁，就算食飽油角煎堆，𢭃足利是，感覺上始終都爭噉啲。邊個迫到毓民封咪、大班避走太平洋，嗰個就係備受詛咒嘅民族罪人。報名截止在即，唔知佢老哥喺三藩市講完耶穌未呢？返嚟歸得隊未呀死毓民？
傳真︰2623-9278
電郵︰