布力般雖然近屆喺英超聯表現麻麻，不過佢哋就有一樣嘢醒，就係將球員甩手甩得好快。好似同領隊桑拿士唔咬弦嘅前鋒高爾咁，佢本來同球隊重有一年合約，而且周薪重高達四萬鎊（約五十八萬港元），如果桑拿士決定喺新球季唔重用高爾，球會淨係支付佢嘅周薪都好襟計。
點知話咁快，布力般就喺上星期六將佢賣咗畀另一支英超聯球隊富咸，而三十二歲嘅高爾重會喺星期二正式成為富咸球員㖭！據桑拿士講，布力般雖然賣走咗高爾，但𠵱家仍然重係前鋒過剩，下一個會離隊嘅，好可能係高爾嘅「黑雙煞」拍檔、淪為第六前鋒嘅約基。
不過，話時話，早輪富咸先呻窮，重要周薪四萬鎊嘅門將雲達沙減人工，先至肯同佢續約；但𠵱家又突然之間簽高爾，真係唔知佢哋嘅會長阿法耶茲同埋領隊高文點諗。
西甲聯球隊華倫西亞想羅致日本新星平山相太，一則為開拓日本市場，二則因平山好厲害，身高一米九四，係日本少有嘅有頭槌有腳法前鋒。不過，呢宗交易就因為平山嘅媽媽唔肯而卡住。原來平山喺日本著名嘅築波大學工程系讀緊一年級，佢媽媽話想佢大學畢業之後先踢波喎！
德甲拜仁慕尼黑喺新球季換上咗新教練馬加夫，自然新人事新作風，據報，馬加夫第一個改變，就係將球隊隊長臂章由門將簡尼嘅手上，轉咗去中場波勒手中。馬加夫咁做都無可厚非，因為簡尼成日話想離隊，上季喺場外又紀律唔好，不如畀都算有領導才能嘅波勒做隊長重好啦！
西方人唔係好鍾意13號，認為不祥。不過，西甲聯巴塞隆拿嘅巴西中場莫達就唱反調，話鍾意13號，話會帶嚟好運，所以好想喺新球季球衣號碼係13號而唔係𠵱家嘅3號。點知話口未完，着住3號球衣嘅佢喺星期日對地方球隊費古利斯嘅友賽整傷膝頭，要唞兩星期，真邪！
傑志搞AC米蘭同紐卡素夾埋唔夠三萬位球迷入場。總領隊伍健話，會將蝕咗嘅幾百萬當做提升傑志同基督教聯合醫務協會慈善賽嘅投資；呢兩場波共兩百三十萬觀眾透過電視睇過，對提升佢哋嘅知名度有好大幫助。前晚有五百球迷加入傑志球迷會，吸納到咁多球迷入會算唔錯囉。