張栢芝上周在蒙古拍攝電影《無極》期間突然感到腎痛，在經理人安排下即時返港治療，經檢查後證實患上急性腎炎，留院一周後已出院，並即時返回蒙古繼續拍攝工作。
張栢芝由去年起一直忙個不停，電影一部接一部地拍，今年初剛拍完《旺角黑夜》，四月即趕赴內地參演陳凱歌執導的《無極》，一周前栢芝在蒙古趕拍該片期間，忽然感到腰部劇痛，經理人公司中國星立刻安排她返港入院檢查，證實她患上急性腎炎，上周一（十二日）起入住銅鑼灣聖保祿醫院接受治療，留醫了一星期。
而在栢芝住院期間，記者數度往聖保祿醫院新翼的二樓病房了解，多次目擊栢芝媽咪及其弟張豪龍和張柏文等在醫院內出入，但栢芝入住的病房外並沒掛上病人姓名的水牌，房門及窗簾亦一直緊閉，看來她今次入院十分低調和秘密。記者大前日（上周六）再到醫院時，發現栢芝媽咪竟於早上約十時在栢芝的鄰房出現，相信她是租住該病房，以方便就近照顧栢芝。
至當日下午約五時，張柏文與一名男子結伴到醫院探病，但不足十分鐘二人便偕同栢芝媽咪及一名女伴一起離開，一行四人還各自手持大袋物品，同行的女伴更攬着一隻馬騮毛公仔。而前日傍晚記者再到醫院時，發現栢芝所住的病房及隔壁的病房都開了門，清潔人員正在打掃，相信栢芝已在前日悄悄出院。
記者昨日致電向栢芝的經理人李小姐求證時，她親口承認栢芝患上急性腎炎留院。李小姐說：「栢芝上個禮拜的確因為腎炎入咗醫院接受治療，個多禮拜前佢喺內地拍戲時，忽然之間覺得腎痛，當時唔知乜嘢事，咁公司就安排佢返嚟香港做檢查，後尾知道係急性腎炎，醫院話需要留院接受一個星期嘅療程，咁住院期間佢媽咪同屋企人都有日日去睇佢。
「栢芝今次發病，醫生話同佢長期疲勞，令到抵抗力弱咗容易感染細菌有關，佢𠵱家已經出咗院，又返咗去蒙古拍《無極》，因為部戲趕，佢都唔可以再留喺香港休息，不過栢芝已經講明，拍埋呢部戲後要休息番一排先至再開工。」
據知栢芝經過一星期治療後，身體仍然虛弱，但為了趕戲亦不得不繼續開工，李小姐說：「我哋喺拍攝現場搵咗個駐場醫生睇住佢，另外佢又帶備藥物去食，應該唔會有乜嘢大問題，如果佢身體狀況唔得，醫生都唔會畀佢出院啦！不過今年佢真係一直拍戲未停過，等佢完埋呢部戲，公司會盡量安排佢放假，等佢可以休息吓！」
採訪、攝影：陳月媚、娛樂突發組
