田少同周太終於肯離開功能組別，走去參加直選。自由黨噚日喺誓師會大打搵情牌，所有候選人嘅屋企人都出晒嚟助選，田太更成為傳媒追訪對像，有記者問田太，會唔會煲多啲湯畀田少補身？田太就話，田少唔揀飲雜食，好容易服侍啫！
田少個愛女都有嚟助選，但佢個仔和女婿就要返工唔得閒嚟。周太就有老公周明權、同埋個細女嚟支持佢，就連陳四萬嘅老公陳棣榮，都特登去遮打花園趁熱鬧。
張宇人今年就如臨大敵，畀楊貫一嘅契女黃倩瑛挑戰，好彩黨友梁劉柔芬同好多潮州同鄉熟，Sophie梁拍心口話，一定幫張宇人掃晒所有潮州食肆票！佢哋又一人講一句選舉心聲，田少嘅心聲係：「你的聲音，我聽到、我做到」、周太重簡單，得一句：「我們直選了。」
自由黨新丁方剛個仔，睇嚟比田少個仔多啲孝心，為咗支持老竇處女下海，特登由上海飛返香港助選。原本裕華嘅余鵬春諗住同方剛砌過，但最終都冇去馬，甚至做埋佢嘅助選團。方剛話，上星期佢大佬方鏗、同埋余鵬春大佬余國春，就特登出嚟講數，好彩最後都傾掂數。
傳真︰2623-9278
電郵︰
