好耐冇炒過嘅德永佳（321），將於周五公布全年業績。經紀黃話，聽聞盈利可能會倒退，而且幅度唔細，但因為最壞時間已經過去，未來業務會有增長，所以芬佬並未放棄德永佳，並繼續睇好。
舊年棉花價格突然大幅急升，好多紡織股盈利都受到打擊，德永佳亦唔例外，但據講踏入今年以來，公司接單量上升，兼且成功將棉花價格上升壓力轉移給客戶，所以邊際利潤回升。
此外，德永佳旗下Baleno的零售生意，舊年上半年曾受沙士影響，但下半年9月起，已經回復增長，而在大陸的發展，估計會愈來愈好，所以德永佳仍然獲得芬佬支持。
德永佳近排股價表現平穩，上周五收6.30元，冇起跌，唔夠半日市成交100萬股，金額634萬元。
另外，招股備受追捧的聯泰控股（311），上周四首日上市即告破底，令唔少捧場客大失所望。不過，第二日即見百記出嚟力掃，半日市唔夠，股價升4.5%，收2.90元。
由於股價仍然低於2.975元的招股價，幕後仍要繼續努力。
慕容小初