無綫劇集《學警雄心》演員關伊彤開工十小時後，原定休息兩小時再開工十二小時，但她昨晨收工駕車接載三名同劇女演員離開時，發生交通意外，四人同時送院治療。今次事件，不禁令人關注到藝人長時間工作的問題，同劇演員吳卓羲承認拍攝工作緊迫，令演員不夠時間休息。張家輝昨日批評無綫拍劇制度不健康；黃日華則指自己曾試過因拍劇太累而發生交通意外。
無綫新劇《學警雄心》開拍以來，演員接連發生交通意外，繼早前陳鍵鋒撞車受傷後，昨晨五時女藝員關伊彤駕駛私家車接載同劇演員陳文靜、伍濼文和夏竹欣離開將軍澳電視廣播城時，與一輛的士相撞，四名女演員全部受傷送院醫治。
原來關伊彤等人前晚約七時開工至昨晨五時始收工，本來四人打算返家稍作休息，然後再於早上七時繼續拍攝外景至晚上七時，拍攝工作排得相當緊密。不過，《學》劇監製黃偉聲指關伊彤等人前晚七時才開工，之前應有足夠時間讓她們休息，所以今次意外應與拍攝時間太緊密而引致休息不足無關。
等紅燈攰到瞓着咗
有份參與《學》劇演出的吳卓羲昨日亦承認近日拍攝工作相當緊迫，並表示若自己不夠精神的話，一定不會自行駕駛以策安全。吳卓羲昨日透過助手說：「基本上我都會繼續開車去開工，但如果只係得一、兩個鐘休息再接外景時，就寧願選擇留喺公司匿埋瞓覺。」
今次車禍事件，再次令人關注無綫藝人需長時間開工缺乏休息的問題，而無綫出身的黃日華，昨日表示多年前曾試過因拍劇太過疲累，在收工駕車返家時發生意外。華仔在電話中說：「以前我經常朝頭早六點開工，收凌晨四點，然後休息兩個鐘，又再開朝早六點收凌晨四點，好多時連續幾日都係咁，冇覺好瞓，攰到死咁滯，試過一次我收工揸車返屋企，等紅燈嗰陣，我攰到瞓着咗，跟住開車就撞咗埋壆，好在都係小事。」
華仔續說：「做電視藝員真係好辛苦，成日冇覺好瞓，開工嗰陣冇咗個靈魂，只得個軀殼，一個人唔夠精神，又點會演得好？我試過頂唔順同公司高層反映，但無綫係上市公司，流水式作業，所以點反映都冇辦法，惟有盡量捱落去囉！其實唔好講話要畀演員休息八個鐘咁多吖，六個鐘都已經好好㗎啦。」
可能要勞工處插手
另一方面，早前拍攝無綫劇集《天涯俠醫》期間捱到病的張家輝，昨日亦表示一直認為無綫的拍劇制度很不健康，他在電話中說：「人始終唔係機器，長期日以繼夜開工，根本就唔夠休息時間，其實以前都有好多人投訴過呢個問題，但咁多年嚟個制度一樣係冇變過，呢啲可能要等政府或勞工處插手先可以解決，勞方勢弱冇乜可以做，因為新人要紅就要靠無綫捧，而無綫嘅工作形式就係咁，頂唔順嘅藝人可以走，所以有能力出外搵食嘅藝人，好自然會走，呢個就係無綫留唔到人嘅最大因素。」
此外，梁思浩昨日表示過往在無綫工作時，檔期都排得十分密，他在電話中說：「我試過開劇同綜藝節目，成個禮拜都冇瞓過。坦白講發生呢啲事都冇人想，藝人受傷公司係應該負責任，不過藝人食得鹹魚要抵得渴，如果藝人嘅體力真係頂唔住，都要同劇組講，安排休息。」
頂唔順應同監製傾
香港電視專業人員協會會長徐小明，昨日亦對無綫藝人休息不足一事表示關注，他在電話中說：「我哋個會當然希望可以保障到會員利益，對會員工作時間都好關注，當然唔可以長期唔畀藝員休息，但暫時重未收到會員投訴，我希望會員可以主動啲，如果真係工作到頂唔順，應該同監製傾吓，又或者可選擇同個會反映，如果問題真係好嚴重，個會可能嘗試同電視台方面作出反映。」
對於藝人批評拍劇工作時間太緊密一事，無綫製作資源部助理總監樂易玲昨回應說：「呢個情況唔係今日發生，人心肉做，我哋都唔想，我哋都想畀演員同工作人員多啲時間休息，但往往要配合租借嘅場地、演員檔期同製作費預算各方面，尤其係好多演員本身檔期好密，畀唔到咁多期拍劇，我哋迫於無奈先至排到咁密啫。其實我哋已經盡量畀時間佢哋唞唞充吓電㗎啦。」
採訪：黎寶蘋、陳月媚、比華利
