昨日引述律師F講索償代理（recoveryagent）之事。工人因工受傷嘅話，本可得到勞工賠償，但有陣時老闆買唔足保險，就會驚住鬧上勞工處、法庭，對自己不利。律師F講：「上到法庭，你估講真理、講公義呢啲抽象觀念嘅咩，係要講確實證據嘅，冇證據嘅話，你自己講真話都冇人信。一個工人本來搵我去索償，老闆知道之後，對個工人拍晒膊頭，送慰問金，叫佢放有薪假期兩個月，慢慢休息，返工後先至講。工人冧晒，唔再搵我，兩個月後佢返工，做多一個月就俾老闆借故炒魷，佢再提因工受傷之事，老闆話：你自己放咗兩個月假，整親自己，關我乜事？工人為之啞咗，想打官司，麻煩好多咯，卒之攞唔到賠償。」
有咁嘅衰老闆，亦有啲玩嘢工人。萬事德久唔久就會激氣一次，因為佢有夥計詐傷請假，喺出面秘撈，萬事德試過搵人去影相做證據，上到勞工處都冇符。呢個社會爾虞我詐，老闆、工人都會各自講大話，最激氣嘅就係啲老實人。
如果老實人索償，搵律師好吖還是搵索償代理好？搵後者，唔使錢；搵前者，要畀律師費，但好多傷者其實可以透過法律援助署搵律師。索償代理如果搞「彎」咗或者涉及疏忽，傷者只能徒呼荷荷；由律師代辦咯喎，有疏忽嘅事情，傷者可以向律師會投訴，或者控告律師。老實講，兩者之間，都係搵律師比較穩陣啲，消費者委員會知得比我哋更多，應該可以做一次比較全面嘅調查，喺《選擇月刊》發表調查結果，等市民知道啲索償嘅竅妙。