薛家燕（好姨）、鄧兆尊、陳彥行同苑瓊丹等一班《皆大歡喜》演員，前晚去咗樟木頭出席「第三屆香港人旅遊節開幕禮」，佢哋重唱歌跳舞助興㖭。
好姨同行姐等成棚人喺台上又唱又跳，內地歌迷都睇得好入神，拍晒手掌。其間苑仔同行姐試過落台同觀眾親密接觸，觀眾都即刻圍住佢哋，大會派咗幾個「實Q」幫行姐護駕，反而苑仔就自己顧自己，唔通因為行姐樣靚身材正，所以好自然咁成為咗「受保護動物」？
好姨話呢次演出因為係當地領導邀請，所以酬勞都好可觀，好姨話：「中國地方咁大，單係廣東省，如果可以逐個巿去登台，真係唱幾年都唱唔晒。」好姨都曾演出過劇集《真情》，問到《真情》同《皆》劇邊套帶畀佢多啲收入，好姨話：「《真》劇做咗五年，《皆》劇只有兩年，所以重未知，如果《皆》劇再做落去，應該可以賺得比較多，因為佢嘅發行網大啲，我都因為咁接咗好多國際廣告。」
記者陳偉權樟木頭直擊
鄭希怡（Yumiko）噚日喺奧海城以「職安大使」身份出席「職安Power全起動音樂會」，重即場唱新歌兼跳舞，雖然係夾嘴形，但Yumiko依然贏得唔少掌聲，講開夾嘴形佢都覺得唔係咁好，佢話：「其實我都唔再係新人，所以以後都盡量會唱現場，不過有時自己聽到都覺得好難聽。」
關心妍（Jade）噚日喺奧海城出席「職安Power全起動音樂會」，講到佢本寫真集胎死腹中，Jade話：「真係可能出唔到，其實我都唔想搞到唔開心，不過公司嘅高層都覺得唔出版會好啲，可能自己條命係做親乜嘢都俾人封殺，始終出唔到都好可惜。」
梁漢文（Edmond）噚日去到紅館擔任排球賽開球禮嘉賓，不過Edmond因為打得太過大力，所以打咗出界。另外，Edmond話中學時有啲男同學會專登打個排球落地下，之後就反彈入女同學嘅裙底，不過佢強調自己從來都冇參與呢個惡行，但佢都冇阻止呢件事發生。
早排劉德華同佢變臉老師彭登懷喺成都做咗個慈善公益活動，被揭發成個騷除咗佢兩個之外，其餘演出者王傑、順子同湯鎮業等都收酬勞，搞到個騷收支唔平衡蝕錢，國家文化部調查事件後有咗結果，成個騷總共蝕咗成一百七十幾萬，而明知呢個係慈善騷重收錢嘅歌星，就要將扣除車馬費剩餘嘅酬勞交番出嚟，重有相應處罰，但就冇講明點罰。
