莘莘學子喺上周三已經陸續開始悠長假期，輕鬆一下之餘，亦要為嚟緊9月升班開學做好準備。
要讀好書，當然要有一套齊全嘅教科書。大使記得讀書嗰時，屋企環境唔好，每逢開學，爸爸、媽媽都會為張羅書簿費而頭都大埋，有時為咗慳錢，都要買啲舊書。近年香港經濟唔好，買舊書嘅情況更加普遍。
宣明會一如以往，今年繼續搞「舊書回收義賣大行動」，歡迎市民捐贈舊書作義賣籌款，一嚟實踐環保概念、二嚟做善事、三嚟又可以為學生提供二手書籍，減輕父母嘅負擔，一舉三得。
值得一提嘅係，宣明會喺8月10日活動開幕儀式之後，會先安排20名蘋果助學金得主免費揀教科書同消閒書，大使喺度特別代表呢班家境清貧但成績優異嘅學生，多謝宣明會今次嘅安排，減輕佢哋唔少教育開支。
宣明會今次活動籌到嘅善款，將會用作推行「雲南迪慶兒童健康及教育改善項目」，幫助內地貧困嘅藏族孩子返學讀書、提供營養食物同埋改善衞生條件，希望大家踴躍參加。
宣明會熱線：23942394
暖流熱線
電話：29908688
傳真：23702192
電郵：
網址：