上周五半日市港股忽然有勢，上周五美股則軟軟哋，而港市又有資金流走迹象，一兩日內港股能否賈其餘勇，再有進帳，有啲疑問。當前個市，大好同大壞都唔似，最好兩手準備。
若然個市再升一兩百點，博佢回頭，吼低位買恒指Put輪，對象係9777同9956。9777喺9月尾夠鐘，輪價19.8仙，溢價2.6%，槓桿率14.2倍。9956喺10月尾到期，輪價15.9仙，溢價5.4%，槓桿率20.5倍。
若然個市回落一兩百點，則博佢回升，吼低位買恒指Call輪，對象有9799同9082。9799喺9月尾到期，輪價9.6仙，溢價2.8%，槓桿率20.3倍。9082年底到期，輪價17.8仙，溢價6.2%，槓桿率15.1倍。兩隻比較，9799始終靚啲。Call輪9952亦係熱門貨，10月尾到期，輪價8.5仙，溢價9.9%，槓桿率47.3倍，咪淨係睇爆炸力，同埋係仙輪波幅勁啲，睇埋溢價，就應該知道博唔過，個市若然反覆落去，隻輪溢價縮縮吓，輪價就會唔見一橛。
保險股跌咗一排，到咗博反彈時候。國壽（2628）上禮拜唔見6.6%，收4.275元，料有趁低吸納，玩國壽Call輪，得隻9822，隻輪9月到期，輪價19.8仙，溢價9.9%，槓桿率21.6倍。數據唔多靚，所以炒此輪之時要速戰速決。其他國壽Call輪，好難揀得落手。
章盛