立法會主席范徐麗泰宣布參選，佢上周總結立法會嘅工作時，好準確咁話，過去四年，行政立法關係只係原地踏步，即係話老董日日話「致力改善兩者關係」係廢話。
八方聽聞，一位好有地位嘅高官亦非常同意范太嘅睇法，因為老董話就話要提早諮詢議員嘅意見，但係結果冇做到，行政部門仍然睬佢都儍，閉門訂晒啲政策然後出台，同以前冇分別。
至於班尊貴議員當然亦一樣爭唔落，兩大政黨民建聯同自由黨都有代表喺行政會議，人工照𢭃，但係從來都唔受任何約束，一見勢色唔對，就掉轉槍頭狂轟政府，「執政聯盟」、「集體負責」、全部發噏風。
既然都冇晒規矩，行政會議散晒，咪大家一齊唱潮州音樂，自己顧自己，政府民望咁低，正如曾辱成話頭，跟阿董搵食，只會有辱冇榮，係人都知應該企喺邊一方。而為保住個生銹鐵飯碗，識做嘅高官只有將議員當神咁拜，怕佢哋重怕過中共，又何來改善關係？
傳真︰2623-9278
電郵︰