跑吓都死妄想贏歐盃
求驗客手記：「大哨」驚冇命開季

唔知係咪因為早前英格蘭「萬人迷」碧咸批評佢效力嘅西甲聯球隊皇家馬德里操練方法唔得，搞到佢狀態唔好，加上球隊上屆「四大皆空」嘅關係；皇馬喺新教練金馬曹帶領下，喺今夏開操以嚟，都操到班球星好甘，而一向「肥仔底」嘅巴西前鋒朗拿度就忍唔住話驚自己捱唔過季前操練。
「哨牙仔」喺上星期六跑完四公里半之後，就死吓死吓、半開玩笑咁話：「我就嚟冇命喇！雖然每年呢個時候都係最難捱嘅，不過今年真係特別辛苦，唔知我可唔可以捱過季前操練呢？希望之後唔使齋操體能時會冇咁辛苦啦！」
不過，朗拿度都知道要有好狀態先至可以攞到好成績，而問佢喺新球季有乜目標，佢就話：「重奪聯賽冠軍係必然嘅事，不過我個人最想攞嘅，就係從來都未攞過嘅歐冠盃。」

巴勒莫升班晒命球員先扮網上明星
巴勒莫升上意甲後高姿態咁四圍挖角，雖然落實交投唔多，但就多咗人留意呢間球會。佢哋球會網（www.ilpalermocalcio.it ）雖冇英文版本，但有齊球員資料、相片同埋桌布下載等；而且有啲簡單遊戲玩，控制住前鋒東尼、中場哥連尼等Q版公仔踢吓波、踩吓電單車，都幾過癮。

老死文仙尼關照米赫洛域投靠國米
米赫洛域同拉素剛剛約滿，不過佢老友文仙尼當然照住佢，由佢落實執教國際米蘭開始就一路傳會搵呢個多年戰友加盟；而據報國米方面已付諸行動，好快成事。響球壇，用人唯親係天經地義，不過米赫洛域都三張五，又出咗名脾氣差，佢加盟對國米是福是禍真係睇過至知。

卡比路頒十大規條祖記球員有排捱
祖雲達斯早兩日開操，新帥卡比路頒布十大規條，包括無論響更衣室同一齊用膳時都唔准用電話、唔准睇報紙傾轉會消息、禁食煙同埋集訓時唔可以同老婆或女友見面；重有件波衫幾時都要收番入波褲。佢明知班球員罰錢濕濕碎，違規要罰跑高爾夫球場三個圈，都幾係嘢㗎。

撇甩爆性史女友艾歷臣豔福停不了
足球領隊有時好風流，好似英格蘭國家隊領隊艾歷臣，自從兩星期前傳出佢因為唔滿意女友蘭茜喺清談節目中大談佢哋性生活後，佢就撇甩蘭茜返老家瑞典度假，身邊重不乏女伴！繼上星期「一拖二」後日前又俾傳媒拍到同金髮美女好親熱，五十六歲嘅艾歷臣都算老而彌堅。