喺親中維園阿伯嘅謾罵及暴力攻擊行動之中，立法會選舉拉開序幕，各黨派候選人紛紛誓師，噚日就輪到有開明慈祥親中派之稱嘅范太高調宣布出場，隻身落港島區！
范太政綱，打正旗號，要求二○一二年應普選特首。范太話，由𠵱家開始，八年之後，港人應有足夠政治經驗可以普選。呢番說話，至少啱聽過不斷左右左轉軚、當初話支持○七普選、後來見阿爺面燶又再收聲玩曖昧嘅民建聯。范太七年來改造形象成功，割腎救女，賺盡天下父母熱淚，駁斥北京護法、「提譴責動議即違反基本法」，亦執法嚴明。
中國政府既已提出，二○二○年之前「解決」所謂嘅「台灣問題」。既然對台灣都有時間表，香港普選，更冇理由冇！
愈遲普選，大陸就愈要向香港輸血托市。屍爬自由行，可以托到幾時？欽點出嚟嘅特首忠心第一，辦事能力其次，完全係阿董第二，香港愈會陰乾。陰陰吓，大陸就一不做二不休，更為直接插手香港內部事務（例如通過校本條例、喝令特區要加強所謂「愛國教育」呀咁），所謂一國兩制，正式玩完，遲早證明屬於搵老襯。
二○一二年有冇機會普選？除非范太有內幕消息，否則都唔睇好，下屆特首，太子章最近股價暴升，聽聞中方阿爺，尤其係大隻江嗰支水，好欣賞佢強推校本條例，惡鬥陳日君，將香港嘅天主教，當做法輪功咁批鬥，呢一樣令到江爺龍顏大悅，隱隱覺得太子章就係明日嘅李光耀。相對之下，英年少同煲呔，就不幸墮後咗少少。
不過亦有市場人士話：太子章嘅弱勢，就係老婆係英國女人。全世界嘅元首，都唔容許第一夫人係外籍，以防做咗「床頭無間」（中華民國蔣經國總統夫人蔣方良例外，因為當年蔣公中正要靠史太林教仔，而且後來照過晒X光，驗明蔣方良只不過係一名俄羅斯女工）。英國係前宗主國，尤為中方大忌，以前香港嘅英軍家眷，成班鬼婆，唔聲唔聲，就係負責傳送英軍同港督府之間嘅機密文件。
若然○七年太子章做咗特首，以佢咁威勢，阿董都做足十年兩屆，有乜理由做一屆咁少？所以普選最快都要喺二○一七年之後，到嗰陣時，現世嘅一班政治精英，包括范太，咁嘅女中豪傑，都經已接近蔣宋美齡嘅年紀，試問又點樣報國？中方若係醒少少，就唔好令范太失望咯。
傳真︰2623-9278
電郵︰