立法會選舉快到肉搏階段，廉署亦推出咗套叫做「選舉舞弊水洗都唔清」嘅電視宣傳片（圖），叫啲人唔好賄選。
片中有個候選人行賄買票，八方八到，拍攝前，套片嘅監製同導演都諗咗好耐，究竟個扮候選人嘅演員戴條乜嘢色嘅綵帶好，因為怕同個別政黨同候選人成日用嘅色相撞，又擔心用咗某隻熱門顏色後，啲候選人為免「惹人誤會」，唔敢揀同一隻色，少個選擇，結果揀咗銀灰色，貪佢唔起眼，夠冷門。
拍攝時個演員洗手洗咗接近一百次，重要借助電腦技術嚟加強水花四濺嘅效果，而且拍完重要出動強力洗潔精，先至可以將手上嘅黑色塑膠彩洗甩。不過，比起手上嘅污垢，有啲候選人當年六四講過啲乜，事後又失憶，良心嘅污點，更難洗清喇，係咪？
傳真︰2623-9278
電郵︰