港股繼續橫行，上周五恒指出現戲劇性反彈，重上12000大關之上，升119點，期指更高收12109，高水50點。
上周大市反覆下跌，恒指在周五曾跌到11862的低位，跌77點，但低位有大盤主動掃入藍籌同國企，結果出現單日轉向，由低位急彈247點至12109，以12059收市，由於風暴襲港，開市兩小時成交已達93億元，而藍籌同國企的成交都比周四為多。成交大增雖有兩個原因，一個係全日要完成的柯打，濃縮在兩小時內完成；另一就係大市突然掉頭上升，迫到淡倉要即時回補。
早前曾經講過，今次調整，幅度唔會太大，但恒指就要落到11800至11900呢啲位，上周尾段，恒指跌到呢個水平就反彈，而且勁度遠比預期為強，顯示調整有機會完成，升浪再展，前路雖阻力重重，但中線上升目標仍係13500至14000。
里昂短期看淡地產股，主要係因為銷售放緩，但中長線就成個大好友姿態，預料恒指在1至3年內，可升至18000。里昂指中國「救」港，估計一年內透過自由行同內地企業來港設立分部的中資，將達2000億至2300億元，令到香港經濟出現結構性轉變，長線就特別看好服務業股份，包括酒店、零售同地產等。
講到里昂，呢輪佢買隻江銅（358），真係可以用「買到開巷」來形容，江銅亦成為近期國企最強勢股份之一，上周五收3.825元，升0.1元，睇勢好大機會上番4字頭。
國指上周五升110點，國企反彈之勢頗為全面，短期到底獲進一步確認。今次上升動力，來自中國宏調成效日顯，包括國內生產總值次季增長僅9.6%，遠比市場預期的10.5%至11%為低；而第2季的固定資產投資增長則比第1季度大幅回落16.8個百分點，至於居民消費價格指數，6月份升5%，仍在可接受水平內。有關數據顯示中國短期內不會加息，對國企有利。
除江銅外，原料股如鋼鐵和石化等亦好強勢；中國鋁業（2600）上周五跌到3.825元後反彈上4.075元收，此股近期跌得多，但大基金一路增持，今次跌定回升，初步目標4.5元，中線可見5.8元。
郭兆誠