薛芷倫前晚到中環出席活動，近日養尊處優的她減少夜蒲，每星期均與女兒騎馬，享受親子樂。對於有名人第二代接觸到毒品，薛芷倫表示子女開始成長，自己會學習，她只會以朋友身份從旁教導。
薛芷倫、姚樂碧、鯊魚女陳細潔偕男友、潘廸生千金潘楚穎及混血名模Rosemary等，前晚到中環國金二期Isola出席活動。
薛芷倫身穿白色背心tee及牛仔褲單拖赴會，談到近況，她說：「𠵱家我忙於做運動，遲啲會同埋啲仔女去美國加州旅行，因為想獎勵佢哋讀書叻，會去環球片場玩。」
薛芷倫續說：「加上我會搞好自己生活，想健康做多啲運動，又想畀多啲時間仔女，平衡吓生活，所以𠵱家每星期都會同個女一齊去騎馬，想培養個女對動物有愛心，亦都希望自己多啲正能量，少啲負能量。」
問薛芷倫對於名人第二代接觸毒品問題時，她說：「唔係剩係香港，全世界都有呢個問題，最重要自己得到平衡，有正面思想，唔好用毒品。我對仔女會留意多啲，花多啲心思同佢哋傾吓偈。」
問薛芷倫會否因海外留學會接觸到毒品，因而不會送子女放洋留學？她說：「如果要發生，喺香港都可以發生，加上𠵱家仔女就快長大變大人，要做錯事自己要學習，我唔信仔女會行差踏錯，已經教佢哋乜嘢係啱，乜嘢係錯，會以朋友身份教導佢哋。」
採訪：JessicaNgan
攝影：MatthewLam
