做快譯通起家嘅權智主席譚偉豪，今年參選九月立法會資訊科技界功能組別議席，佢每星期都會發表一篇「業界心聲」，講吓佢對業界一啲睇法。最近一期佢就做咗個調查報告，睇吓業界對現任立法會代表，即係單仲偕嘅評論。
報告先禮而後兵，先讚賞單仲偕過去六年任內為業界定期發放資訊科技資訊、促使通過電子交易法例等。但轉過頭就大肆發炮，話大部份回應者只給予單仲偕0至4分評分（總分為10分），指佢有政黨包袱，未能全心全意專注於自己專業界別；亦有業界反映單的政黨背景可能令佢未能為業界開拓大陸市場，平白失去大量「機遇」。係咩？楊孝華夠係國泰高層，佢做咗十二年議員，又唔見佢一早同國泰開多幾條飛西安烏魯木齊線？
資訊科技界議席之爭已打到埋身，抹黑行動就快開波嘞。
傳真︰2623-9278
電郵︰